Barcelona chuan Manchester United atangin rawlthar Marc Jurado chu lâkkir leh dan an ngaituah mêk.
Kum 19 a upa defender hian season hmasa khan United under 21 team tan match 25 lai khelin goal 3 a khung bawk, player pawimawh ber te zinga mi a ni.
Jurado hian competitive match a la khel lova, kumin hian Camp Nou lamah a kir leh ngei dawn niin Sport chuan a tarlang.
Spanish chanchinbu tarlan danin Barca chuan an B Team lam thawmthat an duh a, a chhan pawh player thenkhat chhuak tur leh first team lama hlankai tur an awm vang a ni.
Jurado transfer chungchangah Man Utd leh Barca te’n inbiakna an nei mêk a, 2020 khan Jurado hian La Masia Academy chhuahsanin Old Trafford lam a pan a, kumin nipui bazar hian a lo inzir tawhna hmun La Masia Academy ah a kir leh dawn niin a lang.
Jurado hi right back a khel niin 2021 khan United chuan professional contract an ziahpui a, first team ruala a train ve zeuh thin bakah December a Man Utd in winter camp an neih tumin a tel ve nghe nghe bawk.
Youth team lama a chetthat avangin kumin April thlaa Man Utd in Nottingham Forest an hmachhawn tumin Ten Hag chuan squad ah a telh a, mahse a inlan lo thung.
Kumin pre season a Man Utd in 2-0 a Leeds United an hneh tumin erawh Jurado hi bench atanga dah luh a ni a, he match ah hian Red Devils chuan Noam Emeran leh Joe Hugiull te goal hmangin hnehna an chang a ni.