Barca hi tun dinhmuna LaLiga team tha ber anni – Diego Simeone

Atletico Madrid manager Diego Simeone chuan Barcelona chu tun season a Laliga team tha ber anni tiin a fak.

Blaugrana hian league game 21 an khelh atanga point 56 hmu tawh in table chung ber an luah mêk a, 2019 hnuah a vawikhat nan league nomawi chawi turin dinhmun tha takah an ding mêk.

Barca hian an league game hnuhnung 6 atanga 4 ah te hian 1-0 vek in hnehna an chang a, Spanish international Pedri chu player tangkai a ni.

Atletico Madrid manager Diego Simeone chu press conference a neih hnuhnun ber khan Barcelona chungchang zawh a ni a, hetiang hian reporter te zawhna a chhang, “Barcelona hi tun dinhmuna LaLiga team tha ber anni. Xavi hian a player te a fuih tha hle thin.”

“A hma zawngin Xavi hian winger pangngai hmang thin mahse tunah erawh wide midfielder a chhawr zing hle a, Pedri leh Gavi te pawhin an hna an tlin hle. Barca khelhdan phung hi a inthlak ngai lem lova, amaherawhchu Xavi lo awm hnu hian a hma zawng aiin awmzia a nei thuk. Defense lam pawh hma an sawn hle a, Araujo leh Andreas Christensen te hi an che tha em em bawk” a ti.

Barca hian an game leh ah Cadiz an lo mikhual dawn a, Atletico Madrid hian Athletic club ah lo mikhual ve bawk ang. Barca in table chung ber an luah laiin Atletico Madrid lam pawh point 38 nen palina ah an awm mêk.

error: Content is protected !!