Manchester United in Europa League play off round 2nd leg a Barcelona an hneh hnuin captain Bruno Fernandes chuan fans te atanga thlawpna an dawn chu ropui a tih thu a sawi.
Tukin zinglam khan Man Utd leh Barcelona te chuan Europa League round of 16 khel tur zawnna match hnuhnung zawk an khel a, mual neitu lam hian 2-1 a hnehna changin aggregate ah 4-3 niin last 16 an lut.
He inkhelah hian Man Utd lam in si an phur hmasa a, amaherawhchu an khingpuite hi lehthal in goal hnih an pe let! Old Trafford a Man Utd fans te thawm a tha ham ham hle a, team player te chakna hnar ber pakhat pawh a ni chiang e.
Inkhelh banah captain Bruno Fernandes chuan hetiang hian fans te atanga thlawpna an dawn chu ropui a tih thu a sawichhuak,”Player te chunga fans te rinna hi ropui kan ti hle! Tun season a hun harsa lai ber ber ah te min nawr kal tu ber anni. Hun harsa leh khirh ber kan tawh lai pawhin min thlawp tlat a, tun season zet chu kan tha hle anih hi.”
“Keini leh anni (fans) inkarah hian thil danglam bik tak a awm a, an tana hnehna chang turin keini player te pawn theihtawp tak meuh kan chhuah tih an hria. Zanin khan Old Trafford a ri dum dum a, khavanga result tha nei thei pawh kan ni” a ti.
April 2008 hnuah a tum khat nan Manchester United in Barcelona lakah hnehna an chang leh ta a, an tan chuan zan ropui leh chhinchhiahtlak tak a ni! Chutihrualin Ten Hag leh a nau te hi an chawl rei hman dawn lova, an game leh atana an inbuatsaih chho leh nghal char char a ngai dawn.
February ni 26 zanah Red Devils hian game pawimawh tak mai EFL Carabao Cup final match khelh tur an nei a, team hmasawn tak Newcastle United nen nomawi an inchuh ang.