Hriat angin Ballon d’Or hi Football khawvelah mimal chawimawina-ah chuan a sang ber a ni. France football magazine buatsaih niin journalist, national team captain leh ram coach ten vote an thlak thin.
Covid 19 hrileng avangin kum 2020 khan Ballon d’Or award an sem lova, mahse, kuminah erawh chuan an sem tawh ngei a rinawm.
Euro 2020 leh Copa America hian Ballon d’Or dawng tur a ti chiang maithei?
Kum 2020 ang lo takin Robert Lewandowski chu Ballon d’Or dawng tur zingah rin a kai ber ni tawh lo mahse, June thla Ballon d’Or power ranking ah a sang ber, kuminah hian Ballon d’Or dawng tura rinkai tamtak an awm a, dawngtu tur ber a la hriat loh. December thla khian an sem dawn a ni.
Sportskeeda chuan June thla Ballon d’Or power ranking a tarlang leh a, kan rawn tarlang ve leh dawn a ni.
10 Bruno Fernandes – Portugal/Manchester United
Bruno Fernandes hi Manchester United tan khel tha viau mahse, Euro 2020 ah erawh Portugal tan duh angin a che tha lem lo. Heivang hian sawiseltu pawh an awm nuk mi. Euro 2020 ah hian Portugal chu team tha tia han sawi hluai theih an ni lo. Bruno Fernandes hi Portugal tan che tha ve deuh chu ni se, tun ai hian Portugal hi an thleng sang zawk ngei ang.
Manchester United lamah kha chuan a che tha hle a, Premiere League table-ah pahnihna a hauh pui mai bakah Europa League final a thlen pui a nih kha.
Season khelh zawh takah khan kum 26 a upa Fernandes hian all competion ah goal 28 a khung mai bakah assist vawi 17 a nei tling a ni.
9 Ruben Dias – Portugal/Manchester City
Ruben Dias hian 2021 Premiere League Player of the Year Award a dawng a nih kha. Manchester City tan a che tha tak zet. Summer transfer hnuhnung berah khan Benfica atangin Man City a zawm a, Man City full back rinrawl ber pakhat a ni.
Man City khan UEFA Champions League nomawi chawi ta sei, Ballon d’Or power ranking ah Ruben Dias awmna hi a san zawk ngei a rinaw. Euro 2021 ah innghat mahse, Euro atangin Portugal an tla leh tawh si. Tunah a awmna hi June thlaa a position chu a ni e.
8 Erling Haaland – Norway/Borussia Dortmund
Euro 2020-ah Norway an khelh phak loh avangin Erling Haaland pawh Euro ah kan hmu ta lo a ni. Mahse, Borussia Dortmund tan Haaland hi a che tha tak zet a, season duhawm tak a hmang.
Tunlai striker ah chuan a tha ber pawl a ni. 2020-21 seasan khelh zawh takah khan Borussia Dortmund tan match 41 a khelh atangin goal 41 lai mai khungin assist vawi 12 a nei tling bawk. Engtikniah emaw Ballon d’Or a dawn ngei ringtu an tam hle.
7 Harry Kane – England/Tottenham Hotspur
Harry Kane hi tunlai Premiere League striker tha ber a ni ti ila kan sawi sual awm love. Tottenham Hotspur lamin season duhawm lo tak hmang mahse, mimal takin a che tha em em zel a ni. Tottenham-ah hian Kane hi awm lo ta se, Spurs lam pawh tun ang em em hian an that a rinawm loh.
Season khelh zawh takah khan Premiere League Golden Boot leh Playmaker Award a dawng a, he award hi goal khung tam ber leh assist tam ber award a ni. 2020-21 season ah khan all competion ah goal 33 a khung a, assist 17 a nei tling bawk.
Euro 2020 ah England a champion pui thei chuan atan Ballon d’Or a hla vak lovang.
6 Kevin De Bruyne – Belgium/Manchester City
Premiere League lamah Manchester City tan a che tha em em a, Euro 2020 ah pawh a ram Belgium tan a che tha leh hle.
Premiere League season khelh zawh takah khan Man City tan all competion ah match 40 a khelh atangin goal 12 a khung mai bakah assist vawi 18 lai a nei tling a ni.
Euro 2020 Round of 16 ah Portugal hmachhawnin hnehna an chang a, Quarter final-ah Belgium an hmachhawn leh ang. Euro nomawi an chawi thei a nih ngat chuan Ballon d’Or a hla vak lovang.
5 Lionel Messi – Argentina/Barcelona
Lionel Messi hi kum 2021 ah pawh a la che tha hle. Tunah hian a ram Argentina tan Copa America a khel mek a, a ram tan nomawi chawi thei tak ang maw?
Season liamtaah khan all competion ah goal 38 a khung a, assist vawi 14 a nei bawk.
4 Cristiano Ronaldo – Portugal/Juventus
Kum 36 lai maia upa ni tawh mahse, Cristiano Ronaldo hi a la tha hle. Euro 2020 Round of 16 atanga an tlak hma khan goal 5 lai a khung hman a ni.
Season liamtaah khan Serie A bikah goal 30 lai a khung a, Golden Boot a dawng a nih kha. All competion ah match 44 a khelh atangin goal 36 lai a khung a ni. Euro 2020 nomawi hi chawi thei ta se chuan Ballon d’Or a dawn leh mai a rinawm. Mahse, Euro atangin an tla tawh a ni.
3 Kylian Mbappe – France/Paris Saint-Germain
Kylian Mbappe Ballon d’Or power ranking pawh a sang sawt hle. France hi Euro 2020 champion tura rinkai ber anni mek a, an champion thei a nih chuan Ballon d’Or award dawng thut thei dinhmunah a ding mek.
Kum 22 chauhva upa ni mahse, khawvel player tha ber pakhat a nih zia chu hai rual a ni lo. Season liamtaah khan all competion ah match 47 a khelh atangin goal 42 a khung mai bakah assist vawi 11 lai a nei tling a ni.
2 N’Golo Kante – France/Chelsea
Chelsea tan a che tha hle a, UEFA Champions League nomawi a chawi pui a nih kha, Euro 2020 ah France an champion a nih chuan Ballon d’Or a dawn ngei a rinawm.
1 Robert Lewandowski – Poland/Bayern Munich
Covid 19 hrileng avangin kum 2020 Ballon d’Or chu sem a ni lova, kumin 2021 Ballon d’Or erawh an sem ngei a rinawm.
2020 Ballon d’Or kha sem chu ni ta se, Robert Lewandowski hian a dawng ngei ang. Season khelh zawh takah khan European Golden Shoe a dawng a, Bundesliga bikah match 29 a khelh atangin goal 41 lai a khung a ni. All competion ah goal 48 a khung bawk.
Source Sportskeeda