Kan hriat tawh angin Ballon d’Or hi football bikah player mal chawimawina sang ber pakhat a ni. Kum 2020 ah khan Covid 19 hrileng avangin an lo cancel tawh a, kumin kum tawp lamah erawh an sem ngei a rinawm ta.
Paris Saint-Germain player thar Lionel Messi hian Ballon d’Or vawi 6 lai dawng tawhin dawng hnem ber ani mek a, pahnihnaah C Ronaldo awmin Ballon d’Or vawi 5 a dawng ve tawh bawk. Lionel Messi leh Ronaldo Ballon d’Or dawn tluan lai Luka Modric’an pawt chatin kum 2018 khan a dawng ve a ni. Lionel Messi leh C Ronaldo Ballon d’Or dawn zawng zawng belh khawm hi 11 a tling.
Sportskeeda chuan Ballon d’Or Power ranking 2021 a tarlang a, kan rawn tarlang ve leh dawn a ni.
5 Cristiano Ronaldo – Portugal/Manchester United
Cristiano Ronaldo hi tunah hian mipa football atang Ram tana goal khung hnem ber ani mek. September ni 1 ah khan Republic of Ireland an hmachhawn tumin goal 2 a khung a nih kha.
Serie A match 33 a khelh atangin goal 29 lai khungin Capocannoniere award a dawng a, Euro 2020 ah khan Golden Boot a dawng bawk.
Euro 2020 ah khan Portugal tan match 4 atang goal 5 khungin assist vawi 1 a nei tling a, mahse, round of 16 ah an tla a nih kha.
4 N’Golo Kante – France/Chelsea
N’Golo Kante hi Chelsea in UEFA Champions League nomawi an chawi theihnaa player pawimawh tak pakhat a ni. A zawnin vawi 4 lai mai Man of the match atan thlan a ni bawk.
Hei mai bakah Champions League midfielder of the season atan thlan a ni a, France kha Euro 2020 ah khan tla hma lo se chuan Kante tan hian chance a san viau a rinawm.
3 Robert Lewandowski – Poland/Bayern Munich
Robert Lewandowski hi tunlai khawvela striker tha ber pakhat anga sawi a ni. 2020-21 season khelh zawh takah pawh khan goal khung lamah a duailo hle. Bundesliga season khata goal khung hnem ber Gerd Muller record chu khumin goal 40 lai a khung a ni.
Lewandowski hian 2020-21 season khan Bundesliga bikah match 29 atang goal 41 khungin, all competion ah match 40 a khelh atang goal 48 lai a khung a ni.
Tun season tan leh hnu pawh hian match 4 a khelh tawh atangin goal 7 lai a khung leh der tawh a ni. 2020 Ballon d’Or kha cancel lo se chuan a dawng ngei ang le.
2 Jorginho – Italy/Jorginho
Season liamtaah khan Professional footballer thenkhat ten Jorginho an pha lo, UEFA Champions League nomawi Chelsea in an chawi theihnaah khan Jorginho hi player pawimawh tak pakhat a ni. Italy in Euro 2020 nomawi an chawi theihnaah pawh khan a pawimawh leh hle a ni.
Chelsea tan UEFA Super Cup nomawi a chawi leh bawk. Kum 29 a upa hian season duhawm tak a hmang tih chu a chiang a, UEFA Men’s Player of the Year atan thlan a ni. Goal leh assist in an teh lo a ni ber mai.
1 Lionel Messi – Argentina/Paris Saint-Germain
Lionel Messi hian Ballon d’Or a dawng leh mai lovang maw? Argentina in Copa America nomawi an chawi theihnaah khan a pawimawh hle. Golden Boot a dawn mai bakah Best Player Award a dawng bawk.
Copa America 2021 ah khan goal 4 a khung mai bakah assist vawi 5 lai a nei tling a ni.
Source SL