Paris Saint Germain forward Kylian Mbappe chuan kumin Ballon d’Or dawn a phû thawkhat viau niin a hria a, an dan zam thar August – July thla chhunga a chet dan chu ropui a ti.
Ni e, France star hi 2023 Ballon d’Or dawn phu ber te zinga mi a ni ngei a, chutihrualin World Cup winner leh a teammate hlui ni bawk Lionel Messi leh treble winner Erling Haaland te chu a kawng dal theitu tur te anni.
Mbappe hian France chu 2022 World Cup final ah luhpui a, final ah Argentina lakah hattrick siam in he tournamet a top scorer a ni. World Cup final-a a chet dan in khawvel mipui a barakhaih a, World Cup final a hattrick meuh siam a chak zo lo awmchhun a la nih bakah World Cup final a hattrick siam thei pahnihna a ni. England legend Geoff Hurst chuan 1966 khan England tan final ah hattrick a lo siam tawh.
Tin, Mbappe hian season hmasa khan a team chu league title a chawipui a, league game 34 a inlan atangin goal 29 leh assist vawi 5 a thawkchhuak a, Ligue 1 top scorer anih piahlamah European league ah club leh ram tana goal khung tam ber pahnihna a ni. Pakhatna ah Manchester City leh Norwegian striker Erling Haaland a awm.
France Televsion TF1 in an kawmna ah Mbappe chuan Ballon d’Or a dawnna chance a san thu hetiang hian a sawi, “Ballon d’Or maw? Mimal chawimawina chungchang sawi hi a harsa viau thin a, a chhan chu midangte ai hmaa kan indah a ngaih vang a ni.”
Kum 24 a upa chuan sawi chhunzawmin, “Ballon d’Or ka phu em? Aw ka ti ang. An dan zam tharah hian eng nge an ngaih pawimawh zual? Midang mit la taka khelh, goal khung theih leh game a danglamna thlen thei te a ni. Chu an tehna ah chuan ka tling/tlak in ka hria. Mahse vote neitu an awm a, kei erawh a tha lam zawng zela thil ngaituah mi ka ni” a ti.
Mbappe hian season hmasa khan PSG tan inelna hrang hranga game 40 a inlan atangin goal 41 leh assists vawi 10 a thawkchhuak a, World Cup ah France tan match 7 a inlan atangin goal 8 leh assist vawi 2 a thawkchhuak bawk.