Kum 2021 Ballon d’Or award winner hi December ni 5 khian Paris khawpuiah puan ani dawn a, FC Barcelona striker hlui Samuel Eto’o chuan tuna Real Madrid striker ni mek Karim Benzema in Ballon d’Or a phu ber niin a sawi.
“Karim Benzema hi football-ah hian a phu angin chawi mawi a ni lova. Mahse, hetiang thil hi chu Football-ah chuan a awm ve thin a ni.” tiin Cameroonian Samuel Etoo chuan a sawi.
“Tunah hian Karim Benzema hi kumin Ballon d’Or dawn phu ber pakhat ani in ka hria. Mahse, englai pawhin dawn phu ber hi an awm ve reng thin a. Raul, Paolo Maldini, Roberto Carlos te hian he Ballon d’Or hi an dawng ve ngai lo” tiin a sawi belh bawk.
Kumin Ballon d’Or dawng thei tur zingah hian Karim Benzema pawh hi a tel ve ngei a rinawm, a chhan chu club leh ram tan a che tha ang reng hle. Season liamta khan Real Madrid tan a che tha hle, all competion ah goal 30 a khung mai bakah vawi 9 lai mai assist a nei a ni.
Real Madrid tan a chet that mai piah lamah France tan European Championship (Euro) ah pawh khan a che tha ang reng a, goal 4 a khung a ni. Real Madrid forward Karim Benzema pawh hian a career-ah Ballon d’Or vawi khat tal han dawn ve chu a duh ngang a niang, kar tlemte liamtaah khan Ballon d’Or chungchang a sawi ve a ni.
“Ballon d’Or dawn hi player zawng zawng te dream a ni a, ka duh ber pakhat chu team te tanpui a ni. Player zawng zawngin Ballon d’Or dawn hi an duh vek a, keipawhin ka duh tak zet a ni.” tiin Benzema chuan a sawi.
Source