Chelsea captain hlui Cesar Azpilicueta chuan kum 11 hnuah Chelsea Football Club a chhuahsan a, Spanish club Atletico Madrid chu free transfer in a zawm fel deuh chiah bawk.
Kum 33 a upa hi tun hnai kuma Chelsea hlawhtlin theihnan a thawhhlawk hle a, Spanish international hian Blues kawr ha in trophy 13 zet a chawi a, chung zingah chuan Premier League title 2, Europa League 2 leh UEFA Champions League te a tel bawk.
Season hmasa lam erawh Chelsea in hun khirhkhan tak an tawk a, Azpilicueta ngei pawh hliam in a tlakbuak nasa bawk nen, a tan season duhawm lo ber te zinga mi a ni. Chelsea captain hlui hian Blues tan 2022/23 season khan Premier League game 16 ah chauh inkhelh bul a tan.
Azpi hian 2012 khan Ligue 1 club Marseille atangin Chelsea a zawm a, West London club tan hian game 508 lai khel in 2019 a fans te ngainat rawn Gary Cahill chhuah hnu phei chuan captain nihna a kuta hlan a ni.
Nikum nipui bazar lai khan Barcelona chuan Azpilicueta hi lakluh tumin theihtawp an chhuah a, ani pawh in Camp Nou lama insuan a hreh lem lo. Amaherawhchu club lamin an la mamawh thu an hrilh hnuin Spain tana vawi 45 lo inlan tawh tu hian Stamford Brigde a cham chhunzawm turin thutlukna a siam leh hnuhnawh.
Azpilicueta hi Chelsea ah manager hrang hrang 9 hnuaiah khel hman in 2016-17 season kha Blues tana a season hman that ber tum a ni awm e. Italian tactician Antonio Conte hnuaiah defender pawimawh niin a team chu Premier League title a hlawhchhuah pui.
Spanish international in Chelsea a chhuahsan leh tak si ah chuan Blues in kumin nipui bazarah first team player 8 lai an chhuahtir tawh a, chung zingah chuan Kai Havertz leh Mason Mount te pawh an tel nghe nghe.
Kum 33 a upa hian Chelsea ah contract la nei mahse club lam chuan inzahderna tiin free agent in a duhna hmun an pantir a, Azpi hian Spanish club lian Atletico Madrid tan season khat daih tur contract a ziak.
