Atalanta striker Rasmus Hojlund an kuminah Manchester United a zawm châk hle a, May thla daih tawh khan mimal thil ah inremna a lo neihpui tawh nghe nghe.
Kum 20 a upa striker manah Manchester United leh Atalanta te’n inbiakna an nei mêk a, report tarlan danin Red Devils bid hmasa ber €35 million chu hnawl niin Atalanta lam hian an striker manah €45 million an beisei.
Transfer expert Fabrizio Romano chuan Hojlund an Man Utd zawm a châk thu hetiang hian a sawi ”Mimal thil ah Hojlund leh Man Utd te chu May thla ah daih tawh khan an lo inrem fel tawh. Rasmus hian Man Utd a duh em em a, naupan tet ata tawh United fan niin Man Utd tana inkhelh theih hi a châk takzet. He thil hi vawi 100 ka sawi tawh!” a ti.
Man Utd in loan a an hawh Burnley striker Wout Weghorst an chhuah hnuin striker thar lâkluh ngei an duh a, tun dinhmuna top class striker Harry Kane leh Victor Osimhen te an han beisei ve hman zet naa an transfer budget in a phâk ngang loh avangin striker man tlawm zawk lâkluh tumin tan an la ta zawk.
Tun dinhmunah Hojlund chu Man Utd top target a ni mêk a, kum 20 chauha la upa hian theihna sang tak a nei tih lah a chiang narawh. Danish striker hian season hmasa khan Atalanta tan league game 32 (20 starts) a khelh atangin goal 10 leh assist vawi 2 a thawkchhuak a, Euro 2024 qualifier ah Denmark tan game 4 a inlan atanga goal 6 khung tawh bawk in he inelna-a goal khung tam ber a ni mek bawk.