Arsenal chuan nizan khan Premier League match ah Fulham chu 3-0 in an hneh a, tihian manager Mikel Arteta hnuaiah Gunners in vawi 100 hnehna an chang ta. Cottagers lakah Gabriel Magalhaes, Gabriel Martinelli leh Martin Odegaard te chuan goal khat theuh an khung a, Craven Cottage ah Arsenal in nuamsa takin point 3 an hlawhchhuak.
Gunners hian Premier League table chung ber luah chhunzawm zel in pahnihna awm City chu point 5 in an pel leh tawh a, Spanish manager hnuaiah team player te’n hma an sawn takzet.
Unai Emery ban anih hnuin Arsenal chuan an player hlui Mikel Areteta chu head coach thar atn 2019 kum tawp lam khan an lalut a, Arteta hian Arsenal head coach hna a thawh hma in Manchester City manager Pep Guardiola assistant hna a lo thawk tawh thin.
Manager Mikel Arteta hnuaiah Arsenal in hnehna an chan hmasak ber tum chu 2020 kumthar ni kha niin Emirates Stadium ah sihnih faiin Manchester United an tukdawl a, tunah chuan vawi 100 lai hnehna an chang ta.
Arteta hian Arsenal tana a season khatna ah FA Cup chawi nghal mahse league lamah a chetthatpui tehchiam lova, table ah 8-na niin Gunners in season an khar. 2021/22 season ah erawh bul an tan tha em em a, top 4 huanga season khar ngei turin mi tam tak chuan an ring hman. Amaherawhchu season tawp lamah an form an hloh a, an hmelma club Tottenham Hotspur chuan top 4 luahkhalhin Arsenal chuan panga-na ni chungin season an khar.
Arsenal in season tawp lama chetchhiat pawi thui zia an hrechiang a, tun season a league game 11 khelh tur an la hmabak ah hian chetsual an tum lo hle ang le! Gunners game leh tur hi Europa League last 16 2nd leg niin 1st leg a 2-2 a an inhnehtawk pui Sporting CP nen Emirates Stadium ah an insu ang. Europa League la chawi miah lo Arsenal hian a tumkhat nan kumin ah chawi ngei pawh an duh ang.
Mikel Arteta hnuaia Arsenal record – Game played – 167 ; Wins – 100; Drawn – 24; Loss – 43; Win % – 59.8