Shakhtar Donetsk winger Mykhaylo Mudryk chuan January thlaa Premier League club Arsenal pan a chak thu CBS Sport a hrilh. Gunners hian transfer bazar liamta ah khan Mudryk hi an ngaihven a, anni mai bakah Everton lam pawh an tel.

Ukraine international hian season hmasa khan Donetsk tan game 19 a inlan atangin goal hnih leh assist vawi kua a nei. Kum 21 a upa hian September ni 6 Champiions League match a Shakhtar in 4-1 a RB Leipzig an hneh tum in goal a khung ve nghe nghe bawk.

”Thlasik bazar a thlen hunah engkim kan hria ang chu. Min duh tu club thenkhat leh ka transfer chungchangah titi a tam em em a, mahse thil pangngai mai a ni. Tunah chuan Shakhtar ah ka awm mek a, he club tana inkhel hi ka ni. He club hi ka hmangaih a, he team a player awm zawng zawng te pawh ka ngaina hle, Shakhtar hi ka in a ni” tiin Mudryk an club thenkhat nena sawizawm ni mahse Shakhtar player a la nih thu a sawichhuak.

Arsenal zawm tumna a nei em tia an zawhna Mudryk chuan chhang leh in,” Aw, nei e. Ka ngaihdan chuan player a tu a te pawh hian Premier League a khelh chu an chak ang. Arsenal hian team leh coach tha tak an nei a, an khelhdan hmang hi ka duh em em bawk. Keimah lam atang chuan Arsenal sawmna hi ka hnawl thei lovang, mahse transfer thleng tur chuan a huhova thutlukna siam a tul” a ti.

Football London tarlan dan in Mudryk hi £30 million vel tur a ni a, Donbass Arena ah kum 4 daih contract a la nei bawk. Kum 21 a upa hi right wing, left wing leh attacking midfield a chhawr kual theih a ni bawk.

Related Posts

error: Content is protected !!