Zanin zanlai/ naktuk zinglam (16th February) dar 1:00 ah Premier League inkhel hmuhnawm tak thlir tur a awm leh dawn a, league hmahruaitu Arsenal in champion lai Manchester City chu Emirates Stadium ah an lo mikhual ang.
Gunners hian tun season ah league game 21 an khelh atangin point 51 an hlawhchhuak tawh a, Cityzens lam hian league game 22 atangin point 48 an hmu ve tawh bawk. Team pahnihte hi point 3 chauh in an inthlau a, zanin zanlaia Arsenal in hnehna an chan chuan point 6 in hma an hruai fal thei dawn a, City lam an chak anih erawh chuan league hmahruaitu thar hmel kan hmu ang.
Team pahnihte an inhmachhawn hnuhnung vawi 5 ah City lamin hnehna an chang fai vek a, goal 13 lai khung in goal 3 chauh an chhuah thung! Mikel Arteta hian a pu hlui Pep Guardiola fin a chelh lo deuh em ni aw tih theih tur a ni.
Gunners hian an game hnuhnung 5 ah vawi 2 hnehna an chang a, vawi 2 tlawm in tum khat an khingpuite an inhnehtawk pui bawk. Tun hnai tê ah Mikel Arteta leh a nau te’n beisei an pha lo.
Cityzens lam hian an game hnuhnung 5 ah vawi 4 hnehna an chang a, vawi 1 an tlawm thung. Arsenal hmachhawn turin an inbuatsaih tha thawkhat.
Arsenal hian hliam avangin Gabriel Jesus, Smith Rowe, Nelson leh Elneny te an chhawr thei dawn lova, City lam atangin English defender John Stones an Arsenal a hmachhawn thei lovang. Tin, tun season a league goal 25 khung tawh Erling Haaland pawhin Arsenal a hmachhawn thei dawn em tih hriatchian a nilo.
Arsenal Predicted XI: Ramsdale, Zinchenko, Gabriel, Saliba, White Xhaka, Partey, Ødeegard, Martinelli, Nketiah Saka
Manchester City Predicted XI; Ederson, Ake, Laporte, Akanji, Walker, Rodri, Bernardo, De Bruyne, Grealish, Alvarez, Mahrez