Arsenal manager Mikel Arteta an Tomiyasu a fak

Position hrang hranga khel kual thei Takehiro Tomiyasu chu Arsenal manager Mikel Arteta an a fak hle a, a thiamna leh theihna te phochhuak tura inkhelh hun a la neih tur thu a sawi.

Nikum nipui bazar a Emirates Stadium pan tu Tomiyasu hi manager Mikel Arteta an a chhawr tangkai hle a, a ram Japan tan pawh defender rintlak ber te zinga mi niin centre back a hman thin a ni.

A ke veilam nge a hman thiam zawk dinglam tih pawh hriat hran hleih theih loh Tomiyasu hian right back, left back leh centre back a te a khel thei vek a, tun season ah Gunners tan a la inlan dawn chauh niin a lang.

”Tomi hian a ram Japan tan centre back ah a khel thin a, left back leh right back a chhawr kawp theih pawh a ni a chhan chu a ke veilam nge a hman thiam zawk dinglam tih pawh hriat va ni suh” tiin Mikel Arteta an a defender kawl Tomiyasu chu defense lam position hrang hrang a hman theih anih thu a sawi.

Spanish manager chuan sawi chhunzawmin,” Tomiyasu chhawr theihna tur position hi a awm nual a, a tha thei ang bera hman kan duh. Game khelh tur a la tam a, kan la chhawr dawn chauh. Player te’n position khat chauh lo a tha taka an khel thei thin hi a ropui hle” a ti.

Gunners hian tun season kal mek ah league game 6 an khelh atangin point 15 an hlawhchhuak tawh a, table chung berah an awm mek. An game leh ah Brentford an tlawh dawn a, naktuk Pathianni (September ni 18) tlailam dar 4:30 ah match hi khelh a ni ang.

Related Posts

error: Content is protected !!