Arsenal leh Chelsea te chuan Ajax attacking midfielder Mohammed Kudus chu tun nipui bazar hian lâkluh tumin an inchuh dawn.
Football transfer tarlan danin Kudus hian Premier League lam pan a rilrûk a, Chelsea ai chuan season thara Champions League khel tur Arsenal zawm a duh zawk nia sawi a ni bawk.
Blues chuan Ghana international hi ngaihven mêk mahse season thara Champions League an khelh dawn loh avangin an in lalut thei ang em tih chu zawhna awm mêk a ni.
Gunners lam pawhin Kudus hi an ngaihven chho tan viau a, chutihrualin tun nipui bazarah player thar Kai Havertz, Jurrien Timber leh Declan Rice te lâkluh nana sum thanem tak an theh chhuah tawh avangin player thar lalut leh turin an kawllai thenkhat an hralhchhuah a ngai dawn niin a lang.
Kudus hian Ajax hnenah chhuah a duh thu a hrilh tawh a, club lam pawhin an midfielder manah hian £40 million an phut niin report chuan a tarlang.
Kum 22 a upa hian Ajax tan tun thlengin game 84 a inlan tawh a, goal 23 leh assist vawi 11 thawkchhuak tawhin Eredevisie tum hnih a chawi tawh bakah Dutch cup tum khat a chawi tawh bawk.
A kum a la tam lova, hma hun êng tak pawh a nei. Kuminah Arsenal emaw Chelsea in Kudus hi an lâkluh ngei a rinawm a, signing tha anih a beiseiawm.