Manchester United in pre season friendly match ah sihnih faia Arsenal an hneh tumin a nau te khelhdanah Erik Ten Hag a lawm hle.
Tukin khan Man Utd leh Arsenal te chuan Metlife Stadium ah pre season friendly game an khel a, Ten Hag nau te hian 2-0 a hnehna changin captain Bruno Fernandes leh Jadon Sancho te’n goal khat ve ve an khung. Inkhelh pangngai zawh hnuah penalty shootout neih leh a ni a, hetah pawh hian Man Utd chuan hnehna an la chang fan.
Inkhelh banah a nau te khelhdana a lawm thu Ten Hag chuan MUTV kaltlangin a sawichhuak, “Game tha tak a ni a, kan khelhdan, ball kan chan lai emaw chan loh lai pawha kan chet dan khan min tilawm hle. Kha kha kan khelhdun dan tak pawh a ni a, game khelh chhung zawng khan kan nung tha in kan tha a tho em em a, player te’n game tha tak an khel a ni tih an lantir.”
”Kan pressing a tha a, khatianga khelh kha kan duhdan a ni rêng bawk. Pressing khawl (machine) ang mai nih kan duh a, chumi tur chuan a huhova tanruala kan chet a ngai. He thil hi a pawimawh em em a, vawiin khan keimahni lam leh anmahni lamah pawh kan team pressing kha a tha takzet” a ti.
Man Utd goalkeeper thar Andre Onana chuan Arsenal a hmachhawn ve lova, Tom Heaton chu Gunners laka Man Utd siban vengtu a ni. Tin, Bruno Fernandes chu Red Devils captain atana ruat fel anih hnua a team a ho hmasak ber tum a ni a, goal hmasa ber khungin a team a chakpui bawk a, a hna a tlin hle.
Man Utd hian an pre season game leh ah Wrexham an hmachhawn ang.