Manchester City full back Joao Cancelo chu kumin nipui bazara Arsenal player lakluh tum zingah a la tel niin report chuan a tarlang.
Gunners hian nikum nipui bazar lai khan Manchester City atangin Gabriel Jesus leh Oleksandr Zinchenko te an sign a, player pahnihte manah hian £80 million an inseng. Jesus leh Zinchenko te hi Gunners tana signing tha tak niin Mikel Arteta nau te’n league ah pahnihna nia season an khar theih chhanah an thawhhlawk hle nghe nghe.
Gunners in uiawm taka season an khar hnuin kuminah an squad thawmtha turin nasa takin tan an khawh a, Chelsea atangin £65 million a Kai Havertz lalut fel tawh in West Ham United captain Declan Rice manah £105 million an theh chhuak leh bawk ang.
Tin, North London club hian an defense lam thawmtha turin Jurrien Timber lakluh an duh bawk a, Ajax chuan an defender manah hian £50 million vel an beisei nia sawi niin Dutch international hi centre back leh right back a chhawr theih a ni.
Timber ah chauh Gunners an duh tawk mai lova, an defense lam tichak zual turin full back ball thiam tak Joao Cancelo chu lakluh an la duh cheu niin report chuan a tarlang.
Pep Guardiola hnuaia hmun a chan tam loh hnuin Cancelo hian Bundelisga champion Bayern Munich chu loan in thlaruk chhung atan a zawm a, season zawh rualin a ngheta £60 million a sign theih ni mahse Bavarians lam chuan Portuguese international hi kawl chhunzawm lo turin thutlukna an siam fel.
Kum 28 a upa Cancelo hi Pep an thawhpui chhunzawm zel a duh tawh loh avangin club thar a zawn ngei a ngai dawn a, tun dinhmunah Barcelona leh Arsenal te nena sawizawm mek anni.
Barca lam hi an sum dinhmun a that tehchiam loh avangin Cancelo lakluh hi an tan thil awl ai a ni dawn lova, hetiang anih tâkah chuan Cancelo an kuminah Emirates Stadium a pan lo ang tih a sawi theih loh!
City chuan Bayern hnenah Cancelo lak ngheh an duh chuan £60 million an theh chhuah a ngaih thu an lo hrilh tawh a, amaherawhchu Bayern hian Cancelo lak ngheh tumna an nei lova, thlaruk an kawl hnuah an chhuahtir leh a ni. City in Cancelo hi kawl chhawr zel an tum lo bawk nen, an hralhchhuah theihna tur anih dawn phawt chuan a mana an lo chhiar tawh zat £60 million aia tlem pawh in chhuahtir mai an hnial lovang.