Arsenal chuan Ajax atangin Jurrien Timber an lâkluh fel thu an puang a, Dutch international manah hian Gunners chuan €40 million + add ons €5 million insêng in kum 5 chhung daih tur contract an ziahpui bawk.
Timber hi tun nipui bazara Gunners player lâkluh thar pahnihna niin Chelsea atangin Kai Havertz chuan £65 million in Emirates Stadium a lo pan fel tawh. Arsenal an la duhtawk mai dawn lova, Havertz leh Timber te bakah Declan Rice pawh West Ham United atangin £105 million a an lâkluh fel thu an puang thuai ang.
Kum 22 a upa defender hian Ajax tan game 121 inlan a, a ram Netherlands aiawhin match 15 a khel tawh bawk.
Arsenal a zawm chungchangah Timber chuan hetiang hian thu a thlah, “Khawvela team tha ber leh lian ber pakhat tana khelh hi ka duh thin a, chu team chuan game kalphung dik tak an chhawpchhuak tur niin ka ngai. Hlutna nei club, player naupang zawk te tihmasawn thin leh fans te nena inkungkaihna tha tak nei club zawm hi ka rilrûk thin.”
“Tunah chuan ka duh ang ngeiin he hmunah hian ka awm tawh a, ka in ang mai in ka ngai dêr tawh. He hmunah hian thil danglam a thleng mêk a, chung zînga tel ve chu ka duh a ni. Tunah chuan hnathawh tan a hun e” a ti.
Arsenal hian an game leh ah Major League Soccer All stars an hmachhawn dawn a, Timber hi a inlan thei ang em hriat a nilo.