Arsenal in Raheem Sterling an ngaihven

Premier League table a hmahruaitu Arsenal chuan season tharah UEFA Champions League an khel ngei dawn niin a lang a, he inelna a tawnhriat ngah Chelsea forward Raheem Sterling lakluh an tum dawn niin report chuan a tarlang.

2016/17 hnuah Gunners hian Europe a inlena sang ber UCL an la khel leh miah lova, tun season chawhnu lama an che chhe ta duai anih loh chuan season tharah chuan an khelh tawh ngei a rinawm hle.

North London club hian season tharah club level a inelna sang ber UEFA Champions League an khel ngei dawn nia a lang avangin an squad tichak zual tura player thar lakluh an tum dawn a, chung zingah chuan Liverpool leh Manchester City winger hlui Raheem Sterling pawh a tel.

Kum 28 a upa English international hi Gunners boss Mikel Arteta player duh tak nia sawi a ni a, Etihad Stadium ah season hnih leh a chanve chhung an lo thawkdun tawh nghe nghe. Sterling hian Mikel Arteta duhdan a hriat thu leh manager tha tak a nih thu a lo sawi tawh bawk.

Sterling hian 2022 transfer bazar lai khan pound 50 million in Blues a zawm a, amaherawhchu a team thar tan beisei pha lovin league table ah 10-na anih pui mek. Graham Potter nau te hian champion chu sawi loh top 4 huanga season khar tur pawhin an hna a hautak hle dawn a, chuvangin inelna lian hmachhawn a nomawi chawi fo Sterling tan Stamford Bridge a khawsak reng a fuh lo maithei.

Sterling mai bakah Kalidou Koulibaly leh Marc Cucurella te hma hun zel tur pawh hriatchian a ni lova, Blues tana beisei an phak loh avangin season khat hnuah club dang zawm leh pawh nise a mak lovang.

error: Content is protected !!