Premier League round 28 inkhelah Arsenal leh Crystal Palace te chu Emirates Stadium ah an insu a, Arsenal lam hian 4-1 a hnehna changin point 3 hlu tak an hlawhchhuak a, champion turin kawng dik an zawh mêk zel.
He match ah hian Gunners tan Saka chuan goal hnih a khung bakah Martinelli leh Xhaka te’n goal khat ve ve an thawh a, Schlupp chuan Palace tan goal a khung ve bawk.
Palace tukdawltu Arsenal hian tun season league game 22 ah hnehna an chang tawh a, season hmasaa an league game chak zat (22 wins) nen a inzah chiah. Tin, tuna Mikel Arteta hote hi Gunners history a league game hmasa 28 atanga hnehna chang tam ber (22 wins) team anni.
Crystal Palace chuan kumin 2023 chhung hian league match 12 an khelh atangin chakni hmel an la hmu lova (draw 5, loss 7), league point 27 nen table ah 12-na ni mêk in Relegation zone a awm leh 17-na ni mêk bawk West Ham United nen point 3 bakin an inthlau lo. West Ham hian Palace aiin match hnih in an la khel tlem zawk bawk.
Palace laka goal hnih khungtu Bukayo Saka hi Arsenal player atanga 2016-17 season a Alexis Sanchez (24 goals, 10 assist) hnua league goal leh assist double figure nei leh thei hmasa ber a ni (12 goals, 10 assist).
Trossard chuan Arsenal tan league game 10 a inlan atangin assist vawi 6 a thawkchhuak tawh a, January thla atanga chhiarin ani aia Gunners tana league assist nei tam an awm lo. £27 million in Arsenal chuan an lalut anih kha, fuh cher cher tak a ni.
Arsenal hian season kal mêk ah league game 28 atangin point 69 an hlawhchhuak tawh a, table chung ber luah chhunzawm zel in an hnuai chiaha awm Manchester City chu point 8 laiin an chungtlâk ta! Champion rim a nam tan e!
City hian league game 27 atangin point 61 an hlawhchhuak tawh a, an game leh ah Liverpool chu Etihad Stadium ah an hmachhawn ang. Arsenal lam pawhin an game leh ah Leeds United an hmachhawn dawn a, Emirates Stadium ah point 3 dang hmuh leh ngei an tum dawn.