Premier League club Arsenal chuan nipui transfer bazar inhawn hunah Real Madrid forward Marco Asensio chu free transfer a lakluh an tum dawn niin report chuan a tarlang.
Kum 27 a upa hian Carlo Ancelotti hnuaiah hmun a chang tam lo em em a, Italian coach hian tun hnai mai khan Asensio an contract thar a ziak dawn em tih pawh a hriat loh thu a sawichhuak.
Season kal mek ah Asensio hian Real Madrid tan minute 970 chauh a la inkhel a, Santiago Bernabeu ah thla 4 daih bak contract a nei tawh lo bawk.
Nikum nipui transfer bazar lai khan agent Jorge Mendes chuan Asensio hi Premier League club Manchester United, Arsenal, Liverpool leh Chelsea te hnenah a lo zuar tawh a, amaherawhchu a transfer hi a thleng lo hlauh.
Calciomercato tarlan danin Arsenal chuan Asensio hi an duh hle a, manager Mikel Arteta chuan season thara a squad tichak zual turin a hnampuipa hi a thlawna lakluh a duh. Spanish international hi Serie-A champion AC Milan pawhin an beisei ve bawk a, amaherawhchu Arsenal chu Asensio lalut tura dinhmun tha zawk anni.
Spain tana vawi 35 lo inlan tawh Asensio hian Emirates Stadium lam a pan anih chuan Bukayo Saka leh Martin Odegaard te elpui anih loh vek pawh an thlachhang dawltu a ni thei dawn a, Gunners hian an tangkai pui viau mahna le.
Asensio hian Real Madrid kawr ha in game 262 lai a inlan tawh a, goal 53 leh assist vawi 29 thawkchhuak tawhin UEFA Champions League nomawi 3 a chawi tawh bawk.