Season thar atan Arsenal defender William Saliba a phur sur sur tawh hle a, Gunners chu title engpawh hlawhchhuak thei turin theihna an nei niin a ngai.
Mikel Arteta nau te’n mite beisei loh takin season hmasa an hmang tha em em a, an tawp khar dan a fuh lutuk lo tih mai a ni. Chutihrualin pahnihna-a season khar kha anni miau a, season tharah Champions League an khel dawn a, 2017 hnua Champions League-a a inlan leh hmasak ber na tur a ni dawn bawk.
Season hmasa khan Saliba hi season tawp lamah hliam in a tlakbuak a, a inhliam hnuin Gunners an che chhe em em a, Saliba inhliam kha Arsenal champion loh chhan bulpui a ni kan ti thei awm e.
Saliba chuan season hmasa lama a hliam chungchang leh season thar atan beiseina sang tak a neih thu hetiang hian a sawi, “Season tha tak ka hmang a, chutihrualin hliam avangin season ka khar fel thei lo erawh pawi ka ti takzet. He hmunah hian engmah ka la hlawhchhuak lova, chuvangin he club tan hian engkim hlawhchhuah ka duh a ni. Hlawhtlin châk hian ka ril a tam in ka tui a hal hle a, thla li chhung meuh ka inkhelh theihloh avangin team ka tanpui thei lo. Chuvang chuan tun season lo awm turah hian ka inhliam tawh loh ka beisei a, team te nena season hman tluan zak ka duh. Inkhelh châk hian ka tuihal mêk a, inkhel muala tal leh vat ka châk zek zek tawh.”
”Ka ngaihdan chuan engkim hlawhchhuak thei turin theihna ka nei. A sawi ringawt chu a awlsam in ti a ni mahna, mahse coach tha tak kan nei a, mize paukhauh tak tak player kan kawl bakah kumtin mai in hma kan sawn bek bek zel. Rilru paukhauh tak pu player tha zawk te kan la neih belh cheu dawn a, season hmasa lam atangin tawnhriat tha tak kan nei tawh bawk. Season hi a rei hle tih kan hre vek a, chuvangin kan inringtawk a, he club tan hian thil tha engemaw kan tih theih ngei ka beisei” a ti.
2022/23 season uiawm taka khartu Gunners hian an squad tichak zual turin Kai Havertz chu Chelsea atangin £65 million in an sign tawh a, Declan Rice pawh British player man to ber ni turin West Ham atangin £105 million in an sign dawn bawk. Ajax atangin Jurrien Timber chu Arsenal zawm tur a ni bawk a, heng lo pawh Mikel Arteta an player thar a sign leh maithei bawk. Gunners tantute tan season thar a nghahhlelhawm tawh takzet.