2021-22 Premier League season tan a ni a, Arsenal chuan Arteta hovin game hmasa pathumah an khingpui an hneh lo vek. Goal khat pawh an khung lo a ni. Heng te a nih avang hian Arsenal supporter tam takin Arteta chu chhuak tawh mai turin an duh a, an manager hlui Arsene Wenger-a hming pawh lam rik a ni nawk mai.
Arsenal a chhuahsan atang khan kum thum chuang a lo ni ve ta reng mai. Kum 22 lai Arsenal enkawltu Wenger chuan kum 2019 atang khan FIFA’s Chief of Global Football Development hna a thawk mek a.
Premier League title pathum leh FA Cup 7 lai lakpuitu Wenger chu Arsenal supporter tam takin Emirates Stadium-a kir leh turin an duh mek. Tunah hian kum 71 mi a ni ve tawh a, football management lamah hian a kir leh ang em?
Kum 2019 khan Wenger chuan, “Ka hma hun hi a hriat loh, keimah ngei pawhin ka sawi lawk thei lo. Tuna ka hun hman dan hi a nuam ka ti rih hle mai, khawvel hmun hrang hrangah kan zin kual a.
“Pressure sang tak ka hmachhawn thin kha a awm ta lo, a nuam ka ti, ka zalen viauin ka inhria. Chutih laiin inelna hautak tak ang kha ka ngai thin hle a ni,” tiin a sawi a nih kha.
Arsenal dinhmun a tha lo hle, fans lamin Wenger kir leh turin an au mek bawk. Hetiang boruak karah Wenger chu football management lama kir a tum leh tum loh chungchang an zawt a.
“Kum 71 mi ka ni ve ta, hetiang kumah hian kan hriselna hi kan chhut ngun a ngai a, ka thil tih tawhah chuan ka theihna zawng zawng chhuah thin ka ni bawk si. Ka hriselnain a zawh loh tur thil ka ti duh ang em? Tih te hi ka inzawt ve thin.
“Tuktin khan football ground grass rim ka hre thin. Tunah chuan ka kawng zawh a dang ta, office-ah hna ka thawk ta a. Chutih laiin he ka hnathawhnaah hian mikhual angin ka la inngai deuh tlat mai.
“FIFA-ah hian ka hna tlin taka thawh ka duh a, hna hautak tak pawh a ni. Chutih laiin 2022 World Cup-ah chuan FIFA match bihchianna tha em em in lo hmuh ngei ka ring a ni.
“Mi eng emaw zat kan chhawr mek a, hmasawnna tam tak pawh a awm chiang mai,” tiin Wenger chuan a hnathawh laia theihtawp a chhuah thu a sawi.
Wenger chuan Arsenal chungchang sawi chhunzawmin, “Kum 71 mi ka ni ve ta, Arsenal tan khan kan thatlai hun zawng zawng ka pe alawm. Tunah hian an dinhmun hi a tha hle, season tirah game hautak tak pahnih an khel a ni mai a, he team hian theihna sang tak an nei a, an lo kir leh ngei ang tih hi ka ring tlat a ni,” tiin.