Season kal mek ah Arsenal attacking trio Gabriel Martinelli (12 league goals), Bukayo Saka(10 league goals) leh Martin Odegaard(10 league goals) te an che tha em em a, Gunners chakna hnar ber te anni.
Europe Top 5 league ah Arsenal attacking trio aia league goal khung hnem chu Paris Saint Germain attacking trio te chauh anni. Kylian Mbappe chuan league goal 19 a khung tawh a, Neymar leh Messi te’n league goal 13 ve ve an khung tawh bawk.
Messi leh Mbappe te hi FIFA Best Award semchhuah hnuhnun ber khan ranking ah 1-na leh 2-na te anni a, an thianpa Neymar Jr chu 9-na ah a awm ve bawk. Hetih mek lai hian FIFA Best Award dawng thei tur hming 14 chhawpchhuah zingah khing kan sawi Gunners attacking trio te khi an tello vek thung.
Arsenal captain Martin Odegaard hian loan a Dutch club Vitessa Arnhem a zawm tum khan league goal 8 a khung a, hei hi tun season tih loh a league goal a khung tam ber tum a ni. Tin, Gabriel Martinelli pawhin a hma lam khan a tam berah league goal 6 bak a nei tling ngai lova, tun season a goal 12 a rawn nei tawh hi hmasawnna ropui tak a ni.
Saka hian season hmasa khan Arsenal tan inelna hrang hrangah goal 12 khungin 2021-22 season a club top scorer a ni a, hei tun season ah league game 11 la khelh hmabak chungin league goal 10 lai a rawn nei tawh a, kum 21 a upa hian that lam a pan zel tih a hriat theih.
Gunners hian tun season ah league game 27 an khelh atangin point 66 an hlawhchhuak tawh a, table chung ber luah zel in City chu point 5 in an pel leh tawh. Heng league game 27 atang hian league goal 62 an khung a, an attacking trio Martinelli, Saka leh Odegaard te chuan league goal 32 lai an thawh a ni.
