Kumin nipui bazarah Emirates Stadium chhuahsan tur anga sawi thawm tam viau mahse Thomas Partey chuan North London club a la chhuahsan rih mai dawn lo niin a lang.
Kum 30 a upa hi Arsenal lam chuan hralhchhuah mai an pawi ti lova, chutihrualin a manah sum tlem lo tak an phut thung. Ghanaian international hi Saudi Arabian club thenkhat bakah Juventus te’n an dawr a, amaherawhchu Gunners sum phut zat €45 million theh chhuah an hreh avangin Partey hian ngaihven chhunzawm zel a hlawh ta lo.
Transfer expert Fabrizio Romano chuan Arsenal in Southampton midfielder Romeo Lavia an hawisan tan thu leh Thomas Partey chu Emirates Stadium ah a la cham zel a rin thu a sawi.
Belgium rawlthar Lavia hi Liverpool chuan lâkluh tumin an dawr mêk a, a tum hnih nan bid thar add ons nen £45 million an theh lut dawn a, Saints lam erawhin an midfielder manah hian £50 million an chhiar thung.
North London club in Lavia an chang thei dawn lova an hriat hnuin Partey la kawl zel an rilrûk a, a mana an chhiar zat club dangin an rawn offer lo anih chuan Ghanaian international hi la kawl chhunzawm zel an pawi ti lo.
Partey hi season hmasaa Gunners player pawimawh ber te zinga mi a ni a, a team tan inelna hrang hrangah game 40 inlan in goal 3 a khung. Arsenal in pahnihna ni chunga season an khar theih chhanah Partey hi a thawhhlawk hle a, league game 5 bak a hmaih lo.