FIFA World Cup ah Argentina an chawmpion hnua Lionel Messi tawngkam hmasa ber chu Leandro Paredes an tun hnai maia interview a neihna ah a sawichhuak.
Gonzalo Montiel an Argentina tana penalty pet tura goal lam a pan laiin Messi leh Paredes te pawh midang te ang in field chanve a line ah an ding a, Montiel an Argentina champion na goal a khung chiah khan Messi chu a awm hmunah thingthi hnawkin a hmai a hup a, a mittui a tla zawih zawih nghal anih kha.
Paredes pawh hian an champion tih an hriat hnuin Messi chu a va kuah chawt a, a lawm thu a hrilh nghal mawlh mawlh. Player tam zawk erawh champion goal khungtu Montiel lamah an tlan huk thung.
Tun hnaia maia an kawmna ah Paredes hian an champion hnua Messi nena an inbiakna hetiang hian a sawi, “Khami tuma Messi nen kan inkuah mawlh mai kha chu, ka dam chhung hian ka pai reng tawh ang. A lama ka hawi khan a thingthi hnawk tih ka hmu a, World Champion kan nih hnua Messi kuah hmasa ber tu ka ni thei kha a ropui dangdai hle. A hnenah chuan, ‘World champion kan ni ta!’ ka ti a, ani chuan, ‘Ka lawm e, ka lawm e. Ka hmangaih che’ a ti a.”
Paredes hian hliam tenau nei chungin World Cup hun chhung zawng kha a hmang tluan zak a, head coach Lionel Scaloni chuan a theihtawp chhuah turin a lo fuih ve sauh sauh thin bawk. PSG midfielder hian World Cup an chawi hnuin 2024 Copa America ah champion an tum leh tur thu a sawi.
”Hnehna chan hi thil zawngchhang thlak tak a ni. Lionel Scaloni an manager tha ber lawmman a dawn hnu khan lawmpuina thu ka thawn a, ani chuan ‘tun aia nasa zawk hlawhtlinna chang turin ke kan pen a ngai’ tiin min chhang. Chuvang chuan 2024 America hi chawi leh ngei kan tum tur chu a ni” a ti.
Juventus ah a loan contract a hman zawh hnuin Paredes hi Paris Saint Germain lamah a kir leh dawn a, Lionel Messi erawh Paris Saint Germain-a a contract a hman zawh hnuin free transfer in Inter Miami a zawm ang.