Al Nassr in Real Madrid a Ronaldo teammate hlui pahnih lâkluh an duh

Saudi Arabian club hausa tawntaw Al Nassr chuan nipui transfer bazar inhawn hunah Real Madrid a Cristiano Ronaldo teammate ni thin player pahnih lâkluh an duh.

Kumin kumtir khan Portuguese international Cristiano Ronaldo chuan mite beisei loh takin Middle East ram lamah football career chhunzawm turin thutlûkna a siam a, Al Nassr zawm in kum 2 leh a chanve chhung daih tur contract a ziak.

Kum 38 a upa hi tun dinhmuna infiammi sum hailut hnem ber a ni mêk a, season khat chhungin Real Madrid, Juventus leh Manchester United player hlui hian £175 million a hlawh ang.

Hetih mêk lai hian Al Nassr lam chuan Real Madrid a Ronaldo teammate hlui Sergio Ramos leh Luka Modric te lâkluh an tum dawn niin Marca chanchinbu chuan a tarlang.

Spanish international hlui Sergio Ramos hian Nilaithawhtanni zan khan ram tana inkhelh a chawlhsan thu a puang a, Spain head coach Luis de la Feunte ruahmannaa a tel tawh loh vang a ni. Paris Saint Germain tan pawh Ramos hian tun season bak contract a nei tawh lova, a career tawp lama Saudi Arabia lam a pan anih pawhin a âwm lo hran lovang.

Real Madrid midfielder Luka Modric pawhin tun season bak Santiago Bernabeu ah contract a nei tawh lova, club lamin contract thar an la zawrh chiah lo na in Croatia captain hian Real Madrid kawr haa season dang la hman a duh thung.