Al Nassr in Bayern Munich a tlatlum lo Sadio Mane an ngaihven

Al Nassr chuan Bayern Munich a tlatlum lo Sadio Mane an ngaihven mêk a, an squad tichak zual tura lâkluh an tum dawn niin report chuan a tarlang.

Bavarians lam chuan nikum nipui bazara Liverpool atanga an lâkluh Mane hi kuminah hralhchhuah mai an pawi ti lova, chutihrualin a manah €30 million vel an beisei nia sawi a ni.

Kum 31 a upa Mane hian Germany lamah beisei a phâk lutuk lova, a teammate Leroy Sane laka a chetdan rawva tak avanga hrem tawk a lo ni tawh nen, Bayern lam chuan Liverpool forward hlui hi kawl chhunzawm zel lo pawh nise pawi tihna an nei lo.

Hetih mêk lai hian Mane ngaihven mêk tu Al Nassr chu player thar lalut thei lo turin FIFA chuan a hrem mêk a, amaherawhchu Leicester City hnenah Ahmed Musa mana tel add ons £3,90,000 an pêktlâk hunah an chunga hremna hi lâkkian a ni ang.

Engpawhnise Al Nassr hian Leicester hnena an pêktlâk tur sum hi an petla thuai in a rinawm a, chumi hnuah player thar an lalut thei ang.

Al Nassr hian an squad tichak zual turin Inter Milan atangin Croatian international Marcelo Brozovic an lalut tawh a, an hmatawng tichak zual tura Sadio Mane an lalut leh thei ngat anih chuan Ronaldo leh a thiante hian an va hlawkpui dawn em!

Senegalese forward Mane hian 2022/23 season khan Bayern Munich tan inelna hrang hrangah game 37 a inlan a, goal 11 leh assist vawi 6 thawkchhuakin a team chu league title a chawipui.

error: Content is protected !!