2018 World Cup winner Paul Pogba chu tun hnaia European star Saudi lam nena sawizawm thar a ni ve leh ta a, Al Ittihad chuan France star hi kum thum chhunga €100 million hlawh turin an sawm nia report a ni.
Saudi Pro League champion lai Al Ittihad in an nomawi kawllai humhim tumin inthawmthat hna an thawk mêk zel a, Real Madrid atanga 2022 Ballon d’Or winner Karim Benzema an lakluh hnuin Chelsea atangin N’Golo Kante chu free agent in an sign leh bawk.
Tunah lah Sky Sports Italia chuan Al Ittihad in Juventus star Pogba chu €100 million man contract ziahpui an duh thu an tarkang a, tun hnai mai khan Man Utd midfielder hlui hian Al Ittihad training ground tlawh in hei hian fans te sawi zui a hlawh hle nghe nghe.
Saudi nena sawizawm annih chungchangah Pogba chuan Tiktok kaltlangin hetiang hian an zawhna a lo chhang tawh, ”Saudi league ah hian min la hmu ang em tih ka sawi thei mai rih lo. Vawiin anih lo pawhin naktuk ah pawh a ni mahna, ka hre bik lo le. Al Ittihad nge Al Ahly? Ka hre lo. I lo thlir zel phawt ang” a ti.
Pogba hian nikum nipui bazar lai khan free agent in Juventus a zawm leh a, beiseina sang tak nen Turin khawpuiah kir leh mahse hliam in a tibuai tluan zak a ni ber. Kum 30 a upa hian 2022/23 season khan Old Lady tan inelna hrang hrangah game 10 chauh a inlan a, goal khat mah khung lovin assist erawh tum khat a nei hram.
Pogba hian Al Ittihad sawmna pawma Middle East lam a pan chuan ram lama a teammate N’Golo Kante leh Karim Benzema te nen club pakhat tan an khel ho thei dawn a ni.