Saudi Arabian club Al Hilal chuan Lionel Messi chu season khata £194 million hlawh tura sawm an tum niin Marca chanchinbu chuan a tarlang.
Kum 35 a upa hian Parc des Princes ah tun season bak contract a nei tawh lova, a contract neihlai a pawtsei lo anih chuan nipui bazar inhawn hunah free transfer in a duhna hmun a pan thei ang.
Messi pa leh a agent ni bawk Jorge Messi chu Saudi Ambassador niin tun hnai mai khan Saudi Arabia lama hmuh a ni a, a fapa transfer chungchang buaipui a zin anih a rinawm.
Hun rei tak chhung Lionel Messi elpui ber ni thin Cristiano Ronaldo chuan January thlatir khan kumkhat chhunga £175 million hlawh turin Al Nassr a zawm a, football fans tam tak te’n Saudi lam an hawi thup bakah social media lama Ronaldo khelhna Al Nassr ngaihventu leh zuitu pawh an pung nghal hluai a ni.
Al Nassr elpui Al Hilal chuan an club tihthan zel nan leh mi tam zawkin Saudi Pro League an ngaihven zual theihnan Ballon d’Or vawi 7 dawng tawh Lionel Messi lakluh an tum dawn a, a hlawh tur pawh a pui dawn hem hem hle.
Lionel Messi leh a club hlui Barcelona lam chu sawizawm ni ve bawk mahse Argentine captain hi Camp Nou-a a kir leh a rinawm lova, sum lama talbuai tak Barca hian Messi hlawh beisei zat an pe thei in a rinawm lo. Tin, Messi pa Jorge pawhin a fapa chu Barca lama a kir leh tawh a rin tawh loh thu a sawi nghe nghe bawk.
PSG lam chuan contract thar zawrh ve bawk mahse Lionel Messi hian tun thlengin sign tumna a la nei lova, a club hlui Barca ah a kir hmel tawh loh nen, Saudi Pro League ah Ronaldo vs Messi kan hmu leh thut thei!