Saudi lam leh Riyad Mahrez te sawizawm an hlawh tan viau a, Al Ahli chuan Algerian treble winner lakluh nan £30 million bid an theh lut dawn niin Athletic chuan a tarlang. Mail Sport chuan thla hmasa khan Mahrez hian Saudi lama a career hman zawh a duh loh thu a lo tarlang tawh thung.
Man City chuan an winger club a season hnih chhung contract la neitu hi hralhchhuah mai an la tum lo nia sawi a ni a, hetih mek lai hian kum 32 a upa mana £30 million offer hmuh hi a chhe zawk zawk lo.
Mahrez hian season hmasa khan City tan inelna hrang hranga game 46 (35 starts) a inlan atangin goal 15 leh assist vawi 13 a thawkchhuak a, team player thawhhlawk ber te zinga mi a ni.
A team tan thawhhlawk thawhkhat viau mahse Leicester forward hlui hian season hmasa khan FA Cup final leh UEFA Champions League final ah te a inlan lova, hemi avang hian manager Pep Guardiola lakah a lungawi tehchiam lo nia sawi a ni bawk.
Mahrez hian Saudi Pro League a kaithar team Al Ahli a zawm chuan Chelsea goalkeeper hlui Edouard Mendy leh Liverpool legend Roberto Firmino te a khelhpui thei ang.
Engpawhnise Mahrez hian Saudi lam pan tumna a nei em hriat a la ni lova, tun atanga ni reilote hnuah a hma hun zel tur hriatchian a ni ang. Algerian winger hian City tana trophy a chawi theih tur zawng zawng a chawi kim tawh a, a kum lam a uaithla ve deuh tawh nen, sum tam hlawh tura Middle East a pan anih pawhin thil awm lo a ni lovang.