July 2020 khan Hakim Ziyech chuan Ajax atang £36 million ($48m) lai maiin Chelsea a zawm a, mahse, Chelsea ah regular takin first XI a chang mang lo.
Kum 28 a upa Ziyech hi January transfer window inhawn hunah Stamford Bridge atang chhuak tur anga sawi a ni. Amah ngei pawhin Amsterdam lama kir leh chu a duh hle niin a sawi.
Ziyech hian Chelsea-ah hian kum 2025 thleng contract a nei a, mahse, Ajax hi zawm leh dawn ta la i zawm leh duh ang em? tia an zawhna chhangin, “Duh tehreng mai, Ajax-ah hian hun duhawm tak ka hmang.” tiin a chhang.
“Ajax hi ka in anga ka ngaih ve theih a ni a, ka awm zel dan tur chu hmalam hunin a hril ang. Ka thu chu ni se, tunah pawh ka kir nghal ang.”
“Ka thu a ni lova, hetah hian ka la awm rih a ngai, nitin mai hian nuam ti taka hun ka hman a ngai a, ka tihtur te tha takin ka ti zel rih ang.”
“Hunin eng thil nge a rawn herchhuah pui dawn, kan thlir ang. Ka sawi tawh angin, engtikniah emaw ka kir leh theih ngei ka beisei. Ka thu ni lo mahse, huntha a inherchhuak ngei ang.”
Ajax lama hun a hman lai khan Ziyech hi European attacker tha ber pakhat a ni a, domestic nomawi pahnih an chawi mai bakah 2018-19 season khan Champions League semi final an thleng thei.
Mahse, Chelsea supporters te chuan Ajax lama a chet dan kha Chelsea lamah an la hmu lova, hliamin a ti buai ve zeuh zeuh bawk nen, Chelsea tan match 54 inlan tawhin goal 9 a khung mai bakah assist vawi 8 a nei tling mek.
Tunhnai velah Ziyech hi a rawn che tha chho viau a, Watford lakah 2-1 a hnehna an chan tum pawh khan goal a khung a, West Ham laka Mason Mount goal khung tur pawh kha a siamsak a ni.
Source AF