Ajax laka insiamthat tum Liverpool

Kar hmasa a Napoli laka mualpho Liverpool in insiamthat thuai an tum a, naktuk zana Champions League group stage match hnihna ah Ajax laka point thum hlawhchhuah an tum.

Season hmasa a Champions League finalist Liverpool in tun season bul an tan tha lova, Premier League mai bakah Champions League lam thlengin beisei an la pha lo.

Reds hian kar hmasa khan league ah Wolverhampton hmachhawn tur ni mahse Queen Elizabeth II boralna avangin sawn hlat a ni a, naktuk zanlai dar 12:30 a Ajax an hmachhawn tur erawh dan pangngai anga kalpui tur a ni ang.

”Kan insiamthat a ngai a, chhanletna dik kan hmuhtir a tul” tiin Liverpool manager Jurgen Klopp an Ajax laka insiamthat an tum thu a sawi.

German coach chuan sawi chhunzawmin,”Ajax nen kan dinhmun hi a inep chiah a, keini kan chet that loh laiin anni erawh an che tha em em thung. An squad thawmthat hna pawh rang takin an kalpui a, hetianga an che tha hi a mak hran lo” a ti.

Ajax hian tun season match sarih an khelh atangin hnehna an la chang vek a, kar hmasa a Champions League group stage match hmasa bera Rangers an hmachhawn tum pawh in 4-0 ngawtin hnehna an chang thei. Liverpool ve thung hi tun season a match sarih an khelh atangin tum hnih ah chauh hnehna an chang a, Klopp hnuaia Liverpool in season bul an tan chhiat ber tum an tawng! Ajax laka point thum hmu turin Klopp leh a nau te an tan nasat a ngai ang.

Related Posts

error: Content is protected !!