Paris Saint Germain president Nasser Al Khelaifi chuan an star player Kylian Mbappe an a thlawna club a chhuahsan loh tur thu a sawi chiang.
Mbappe hian PSG ah season khat bak contract a nei tawh lova, kuminah club in an hralhchhuak lo anih chuan nakkumah a thlawnin a chhuak thei ang.
Mbappe leh PSG hotute duhdan a inkalh mêk a, France captain hian PSG ah a contract neihlai hman zawh a nakkumah a thlawna club dang zawm a tum a, PSG hotute hnenah a contract a pawhsei loh tur thu chiang takin a hrilh. Club lamin erawh an forward kum 24 a upa hi a thlawna chhuahtir an tum lo bur a, PSG ah a la cham duh anih chuan contract thar a ziah a ngai a, chuti niloa a chhuak duh anih chuan kumin chhung la la a hralhchhuaha a hralhna man atanga sum thahnem tak hailuh an duh.
Tun hnai maia an kawmna ah PSG president Nasser Al Khelaifi chuan Mbappe transfer chungchang hetiang hian a sawi , “Mbappe laka kan duhdan chu engkim a lang chiang e. June 2024 ah a thlawna club a chhuahsan hi kan remti dawn lo. Thil theihloh tawp a ni.”
”Kylian hi club ah a la cham duh anih chuan keini lam pawhin a la cham hi kan remti a, la cham ngei se tih pawh kan duh. Amaherawhchu chumi thleng tur chuan contract thar a ziah ngei ngei a ngai.”
”Khawvela player tha ber hi a thlawn maia chan kan duh lova, thil theihloh hulhual anga ngaih a ni. Mbappe pawhin a thlawna club a chhuahsan loh tur thu a lo sawi tawh a, a rilru a lo thlak danglam ta anih chuan chu chu keini lam thiamloh a ni tawh lo” a ti.
Mbappe hi nikum lam khan Real in an dawr a, lakluh tumin theihtawp chhuah mahse Monaco star hlui hian PSG ah contract thar a ziah avangin Mbappe lakluh tumtu Real an hlawhchham chiang hle.
Kumin nipui bazar a lo inherchhuak a, Real leh Mbappe te sawizawm ni leh mahse Los Blancos hian official takin France forward hi an la dawr lova, report thenkhat tarlan dan phei chuan 2023-24 season a Real Madrid plan ah Mbappe a tel lova, nakkumah a thlawna lakluh an tum ang tih a ni.
Hetiang anih takah chuan PSG in contract thar ziah tum lo Mbappe hi kuminah hralhchhuah ngei an duh dawn a, an chhiarna man zata lei ngam an awm chuan France club hian an star player hi an chhuahtir ngei ang.
Mbappe hi Real mai nilo Premier League club lian te nena sawizawm anni ve bawk a, chutihrualin Mbappe hian Real Madrid lo club lian dang a zawm duh kher ang em tih chu zawhna awm mek a ni. France captain hian PSG a tibuai chho tan viau niin a lang.