A khup (ACL) hliam zai a ngaih avangin Wesley Fofana a chawlh rei a ngai dawn a, season thar tha taka bul tan tum Chelsea tan thu lawmawm tak a nilo.
Kum 22 a upa hi a khup hliam avangin US a pre season tour ah a teammate te rualin a zin ve lova, a khup hliam endik (scan) anih hnuin zai a ngai hial! A hliam zai a ngaih avang hian thla 8-9 vel chawlh a mamawh ang.
Nikum nipui bazar lai khan France international hian £70 million + 5 million add ons in Leicester City atangin Chelsea a zawm a, beiseina sang tak nen Stamford Bridge lam pan mahse hliam in a tlâkbuak nasat avangin a beisei ang a thleng lo.
Nikum October thla khan khup hliam a nei a, thla hnih chhung meuh a chawlh hnuin a lo kir leh. A inkhelh theih atanga ni 4 hnu ah a hliam ngai tho a nei leh a, ni 55 dang a chawlh leh a ngaih phah!
Mauricio Pochettino an tun dinhmunah centre back duhthlan tur pali; Levi Colwill, Thiago Silva, Trevoh Chalobah leh Benoît Badiashile te a nei mêk a, amaherawhchu Badiashile hi a kaihza hliam a la dam chian loh avangin US lamah tour nei turin a tel ve thei lo a ni.