Lionel Messi chuan ram tana inkhelh a chawlhsan hun chu a hnai tawh hle tih a hrechiang a, a hun tur tak erawh a sawi thei mai rih lo.
Kum 36 a upa hian nikum khan Argentina chu FIFA World Cup a chawi pui, team captain niin match 8 a inlan atangin goal 7 leh assist vawi 3 a thawkchhuak a, ram tan a thawhhlawk hle.
Barca captain hlui hian World Cup hma hian Argentina chu Copa America leh Finallisima te a lo chawipui tawh a, tunah chuan ram tana major trophy a chawi theih tur zawng zawng a chawi kim ta!
Inter Miami zawm tur Messi hian TV Publica in an kawmna ah ram tana inkhelh a chawlhsan hun tur chungchangah a ngaihdan hetiang hian a sawi, ”Dik taka sawi chuan engtik ah nge a thlen dawn tih ka hre mai bik lo. A thlen hun tur takah a thleng mai a ni ang chu. Tun hnai maia engkim ka hlawhchhuah fel hnuin ka la tihtur zawng chu nuam ti taka ka hun la neih te hman a ni. Pathian in chawlh a hun e a tih hun a awm mai ang.”
”Kum ang zawnga kan en anih chuan inkhelh ka chawlhsan hun a hnai tawh tih hi ka chiang. Mahse engtik nge a hun tur tak ni ang tih chu ka la hre mai bik lo. Nitin mai hian nuam ti taka hun hman ka duh a, thil mawi tinreng mai te hi hlimpui ka duh. National team lamah hun harsa tak vawi tam kan lo hmachhawn a, Copa America leh World Cup champion kan ni thei ta mai hi kan vannei takzet. Tun hi nuam ti taka awm hun chu a ni” a ti.
Messi hian PSG-a a contract a hman zawh hnuin Saudi leh European club thenkhat atangin offer dawng mahse a chhungte leh ama tan pawha tha ber tura a ngaih Major League Soccer lam pan turin thutlukna a siam fel.
Tun Pathianni lo thleng turah hian Messi chu Inter Miami player anga pholanna hun hman a ni dawn a, tun thla ni 21 khian a team thar tana a game hmasa ber a khelh a rinawm bawk.
