Paris Saint Germain forward Kylian Mbappe chuan nimin lam khan team training a zawm tan a, a hma hun tur chungchangah manager leh club hotute nen inbiakna an nei thuai ang.
Kum 24 a upa hian 2024 ah a thlawna Parc des Princes chhuahsan a duh avangin season thar pawh France khawpuia la cham a duh a, club lam erawhin an forward hian contract thar a ziah loh chuan tun nipui bazarah hralhchhuah ngei an duh thung.
PSG president Nasser Al Khelaifi chuan Mbappe hi inngaituah chian nana ni 10 vel bak hun a neih loh thu a lo sawi tawh a, nakkumah a thlawna PSG chhuahsan tura thutlûkna a siam ta mai chu mak pawh a tih viau thu a sawi nghe nghe.
PSG hian tun atanga ni reilote hnuah Mbappe nu leh agent ni bawk Fayza Lamari chu inbiakna mumal tak an neihpui dawn a, Mbappe hma hun tur chungchang sawihona neih a ni ang.
Report tarlan danin Mbappe hian PSG manager thar Luis Enrique hnenah club a la cham zel a duh thu a hrilh a, Spanish coach pawh hian 2022 FIFA World Cup Goldent Boot dawngtu hi season tharah la kawl a duh.
Club hotute duhdan erawh Mbappe leh manager Luis Enrique te duhdan nen a inkalh hlauh thung a, PSG chuan an forward hot tak hi nakkumah a thlawna chân dawn ai chuan kuminah man to taka hralhchhuah an tum dawn.
Nikum lama Mbappe lâkluh tumtu Real Madrid hming a ri leh tan a, amaherawhchu Los Blancos hian France captain hi official takin an la dawr lo thung.
PSG chuan Mbappe manah £150 million an chhiar nia sawi a ni a, Real Madrid lamin erawh hetiang zata tam sum hi an theh chhuak ngam ang em tih chu zawhna awm mêk a ni. Tin, 2023-24 season a Real Madrid ruahmanna ah Mbappe hi a tel lo nia sawi a ni bawk a, France forward transfer boruak hi a ngaihnawm chho zel dawn e.