Tukin zinglam dar 5:30 khan Leagues Cup match khelh niin DRV PNK Stadium ah Cruz Azul leh Inter Miami te an inhmachhawn a, mual neitu Miami lam chuan 2-1 a hnehna chang in chakna goal khungtu hi tudang ni lovin Lionel Messi a ni.
He inkhelah hian Inter Miami zawm hlim Lionel Messi leh Sergio Busquets te chuan inkhelh bul an tan lova, second half minute 54 na a dah luh ve ve anni.
Inter Miami forward Taylor chuan first half tawp hma hret minute 44 na ah he game a goal lut hmasa ber hi a khung a, score chu 1-0 niin chawlhlâwk-na hun in a zui nghal.
Second half minute 54 na ah Inter Miami chuan an player lâkluh thar pahnih Messi leh Busquets te an dah lut a, inkhel entute thawm pawh a tha zual hle.
Amaherawhchu minute 65 na ah Mexican club Cruz Azul chuan Antuna goal hmangin an siphurh an rawn sut a, Miami fans thawm bengchheng lutuk a vaw dai hret.
Team pahnihte an inhnehtawk dawn emaw tih hnuin Lionel Messi an rawn che! Minute 90+4 a Inter Miami lam free kick hlawhchhuah chu Lionel Messi an tha zetin goal ah a chhuihlut a, Miami tana a game hmasa berah a team thar chu hnehna a chanpui nghal!
Ti hian Miami chu Leagues Cup group J ah khelh khat atanga point 3 nen table chung berah an luah a, an hnuaiah Atlanta United leh Cruz Azul te an awm.
Tun hnai inelna hrang hrang game 6 chhunga chakni hmel an hmuh loh hnuin Inter Miami an chak ve leh ta a, a bîkin Messi tan ni chhinchhiahtlak tak a va ni êm!
Miami game leh tur hi Leagues Cup match tho niin Atlanta United chu DRV PNK Stadium ah an lo mikhual dawn a, match hi July ni 26, zinglam dar 5 a khelh tan a ni ang.
