Old Trafford a Europa League Round of 16 play off second leg khelh a nih hunah Barcelona rawlthar pahnih Gavi leh Pedri te an inlan thei dawn lo.
Nizana 1st leg khelh a nih in Spanish midfielder pahnihte hi an inlan ve ve a, kum 20 a upa Pedri chu hliam avangin minute 41 na ah lakchhuak a ni. Kum 18 a upa Gavi pawhin Man Utd midfielder Fred laka foul a neih avangin yellow card a chawi a, tun season European competition-a a vawi thum hmuhna niin an game leh atan suspension a tawk.
Red Devils lam atangin Lisandro Martinez leh Marcelo Sabitzer te chuan nizan khan Camp Nou ah Barca an hmachhawn ve lova, a chhan pawh suspension an tawh vang a ni. Loan player Sabitzer hi Bayern lama yellow card a lo chawi tawh vang te a ni a, 2nd leg ah erawh player pahnihte hian Xavi team te an hmachhawn thei ang.
La Masia chhuak Gavi an season kal mek ah Barca tan game 30 a inlan tawh a, match 22 ah te inkhelh bul a tan bawk. A thianpa leh a teammate ni bawk Pedri pawh in tun season ah Barca kawr ha in match 28 a khel tawh a, match 25 ah te inkhelh bul a tan nghe nghe. Barca player pawimawh pahnihte’n second leg a Man Utd an hmachhawn thei lo tur hi Blaugrana tan a pawi thui viau maithei.
2nd leg hi February ni 24 zinglam dar 1:30 a khelh a ni dawn a, 1st leg ang in match hmuhnawm tak an chhawpchhuak leh turah ngai ang. Erik Ten Hag nau te an hah dawn hle niin a lang bawk a, Barca an hmachhawn atanga ni thum em pawh a la ral hma in Newcastle United nen Carabao Cup an inchuh ang. Final match hi February ni 26 zan dar 10;00 a khelh a ni ang.
