Brazil Football Federation chuan 2024 Copa America ah Carlo Ancelotti an Brazil National Team te a enkawl tur thu AFP kaltkangin an sawi chiang a, Real Madrid coach hian Brazil head coach hna a thawh tan hma in Fluminense manager Fernando Diniz chuan Brazil interim manager hna a lo thawh rih ang.
Italian manager Ancelotti hian Santiago Bernabeu ah season khat bak contract a nei tawh lova, a contract a hman zawh hunah United States a 2024 Copa America inelna ah Brazil team a ho zui ang.
AC Milan leh Chelsea boss hlui hi kum 60 dawn hnua Brazil team coach thei ram dang manager a ni dawn a, Brazil team kaihruai thei ram dang mi hnuhnung ber chu Argentine manager hlui Filpo Nunez kha niin 1965 khan game khat chauh Brazil team a ho a ni!
Brazil National Team coach thar tur Ancelotti a theuneu lova, khawvela manager ropui ber te zinga mi niin kum 64 a upa hian AC Milan leh Real Madrid te chu Champions League title vawi hnih ve ve a chawipui tawh. Tin, league title pawh Chelsea (Premier League), Bayern Munich (Bundesliga), Paris Saint Germain (Ligue 1), AC Milan (Serie-A) leh Real Madrid (Laliga) ah te a chawi tawh a, heng league lar zual 5 a league title hlawhchhuak vek thei manager awmchhun a ni bawk.
Brazil National Team hi nikum FIFA World Cup lai khan Tite an a ho a, amaherawhchu quarter final a Croatia an ngam loh hnuin Tite an Brazil head coach hna a bansan zui.
Tite a ban fel hnuin Ramon Menezes chu Brazil team enkawl tura ruat a ni a, a hnu deuh lawk ah CBF chuan interim manager atan Diniz an lakluh thu an puang leh. Hun a liam leh deuh a, Carlo Ancelotti chu inremna neihpuiin Real Madrid head coach hian 2024 June thla atangin Brazil head coach hna a thawk chho tan ang.