Manchester City legend Yaya Toure chuan 2022-23 season Manchester City team aiin 2008-09 season a Barcelona team an that zawk thu a sawi.
2008-09 season khan Pep Guardiola ho in Barca chu treble champion anni a, Laliga, Copa del Rey bakah UEFA Champions League te an chawi. Kum engemaw zah liam hnuah Manchester City chu Pep Guardiola hnuaiah treble champion rawn ni ve leh in Cityzens hian season hmasa khan Premier League, FA Cup leh UEFA Champions League te an chawi.
Mi tam takin 2009 Barca leh 2023 City te an khaikhin a, a khawi lam nge tha zawk tih ah inhnialna a awm ve leh zeuh bawk. Barca 2009 team a tel leh City legend ni bawk Yaya Toure pawhin a ngaihdan a sawi a, 2009 Barca chu 2023 City aiin an tha zawk in a hria.
”Thlan thiam a harsa hle a, mahse kha team (2009 Barca) kha chu superstars inpawlh niin player ropui tak tak an kat nuk bawk. Barca 2009 lam kha 100% a an chak zawk ka ring. Thierry Henry, Messi, Samuel Eto’o, khatih hunlaia player tha ber ber te anni a, chumi hnuah Iniesta, Xavi leh Busquets te mawlh mai kha! Kha team kha chu complete team a ni!” tiin Toure chuan 2009 Barca a dahsan zia a sawi.
Kum 40 a upa chuan sawi chhunzawmin, “Kha team a tel ve theih kha chu suangtuahna thleng dik ang mai hi a ni. Training session ah pawh game kha a tang em em thin a, nitina kan level chhawmnung kha khita awm a ni. Kum 26 emaw 27 a upa anih laia Iniesta kha i la mitthla thei ang chu, Xavi nise kum 28 vel mi a nih lai kha a ni a, khang huna Iniesta leh Xavi te that dan mawlh mai kha a ropui a ni!” a ti.
Pep Guardiola hnuaia a tlaktlum loh hnuin Yaya Toure hian 2010 khan Manchester City a zawm a, Cityzens tan hian game 316 khel in goal 79 a khung. 2018 khan Toure hian Etihad Stadium a chhuahsan a, City tana Premier League title 3 chawi tu hi club legend zinga mi a ni.
