Kan hriat angin international break neih a ni a, hemi chhung hian 2022 FIFA World Cup khel thei turin ram thenkhatte an inpet tling a ni. 2021 Copa America champion Argentina pawh in pet tling tawhin, world champion nilai France leh World Cup nomawi vawi 5 chawi tawhtu Brazil te pawh an inpet tling ve bawk.
Ronaldo leh Messi tan 2022 FIFA World Cup hi an tan a hnuhnung ber a ni tawh mai thei
Nakum FIFA World Cup khelh tur hi Lionel Messi leh Cristiano Ronaldo inlan theihna World Cup hnuhnung ber a ni hial tawh mai thei. Nimin khan Argentina team te chu World Cup khel turin an inpet kai a, Cristiano Ronaldo team Portugal erawh FIFA World Cup 2022 an khelh theihna turin playoff an khelh a ngai dawn a ni.
Qatar lama khel tur hian player hlu tak tak an awm nual a, football club angin national team hlut lam hi chhut a harsat chang a awm thin. Mahse, tun tumah hian FIFA World Cup khel tura inpet tling tawh atanga hlu zual (Most Valuable team) 5 kan rawn tarlang ve leh dawn a ni.
5 Spain (€728 million)
Spain hi qualifiers match an khelh tawh chinah an perform tha hle. 2010 FIFA World Cup winner hian Sweden hmachhawnin hun tawp dawna Alvaro Morata goal khung hmangin hnehna an chang a, nakum FIFA World Cup khel turin an inpet tling.
Spanish national team hlut zawng hi €728 million a ni a, Qatar-a WOrld Cup khel tur team tling tawh atangin 5 na dinhmun an hauh. Manchester City defensive midifielder Rodri chu Spain player hlu ber a ni a, a hlut zawng hi €70 million vel a ni. Pahnihnaah Midfielder Koke awmin a hlut zawng hi €60 million niin a pathumnaah Dani Olmo awm bawkin a hlut zawng hi €50 million a ni.
4 Argentina (€747.50 million)
Copa America winner Argentina hi 2022 FIFA World Cup qualified hnuhnung ber anni a. An game hnuhnung berah Brazil nen 0-0 in indraw mahse, an tlang ta tho a ni.
Argentina squad-ah hian Lionel Messi chu tun season khelh mekah che tha vak lo mahse player hlu ber a ni. Messi leh Lautaro Martinez hlut zawng hi €80 million ve ve a ni. Argentina squad pumpui hlut zawng chu €747.50 million lai a tling.
3 Brazil (€870.50 million)
Brazil hi FIFA World Cup-ah chuan awmzia annei thui hle. A zawnin vawi 22 lai FIFA WOrld Cup an khel tling tawh a, vawi 5 lai mai an champion tawh a ni. Nakum World Cup khel thei tur hian kar hmasa khan Colombia an lo hneh daih tawh a ni.
Brazil hian player hlu an nei nual a, an hlut zawng hi €50 million chung lam deuh vek anni. Brazil player hluzual te chu Marquinhos (€75 million), Casemiro (€70 million), Liverpoll star pahnih Alisson leh Fabinho (€60 million) leh Gabriel Jesus (€60 million) te hi anni. Brazil player zingah hlu ber chu Neymar niin a hlut zawng hi €100 million lai a tling.
2 France (€978.80 million)
Euro 2020 khelh takah khan France hi champion tura rinkai ber anni a, mahse, duh angin leh beisei angin an tan thil a thleng lo. Tun tumah pawh hian Champion tura rinkai ber anni leh ngei ang.
Group D-ah awmin an game hnuhnung berah Kazakhstan chu 8-0 lai maiin an hneh a, World Cup Qualifier paltlang chiang ber anni.
Kan hriat angin French national team hian Europe major league lamah an player te an thawh hnem em em a, player tha chin thah anni. France squad-ah Kylian Mbappe hi player hlu ber a ni a, a hlut zawng hi €160 million lai a tling. Paul Pogba leh Cenral defender Dayot Upamecano leh Jule Kounde te hlut zawng hi €60 million a tling ve bawk.
1 England (€1.23 billion)
Tunlai football khawvelah-ah England hian squad annei hlu ber a. The Three Lions hian rawlthar player talent nei tha tak tak an kawl fur a ni. England pawh hi 2022 FIFA World Cup qualified turin San Marino chu 10-0 lai maiin an hneh a ni.
An squad hlut zawng hi €1.23 billion lai a ni a, an player hlut zawng tlangpui hi €70 – €100 million a ni. Jack Grealish, Raheem Sterling, Phil Foden, Trent-Alexander Arnold leh Mason Mount te hi player hlu zual te anni. AMaherawhchu Harry Kane hi England squad-a player hlu ber niin a hlut zawng hi €120 million lai a tling.
Source SL