Qatar 2022 FIFA World Cup khel turin Lionel Scaloni leh a nau te an inpuahchah mek zel a, he nomawi chawi thei tura rinkai ber te zinga mi anni. Argentina hian nikum khan Copa America final ah World Cup vawi nga lo chawi tawh Brazil chu 1-0 in an hneh a, Ballon d’Or vawi sarih dawng tawh Lionel Messi chuan a ram tana major trophy a chawi tum khatna a ni nghe nghe.
Copa America-a an champion hnuin Argentina hian tunkum June thla khan CONMEBOL-UEFA Cup of Champions ah 2020 Euro Champion Italy chu 3-0 in an sawp a, Finallisima an chawi leh.
Tun hnai kuma nomawi pahnih chawitu Argentina hian match 33 lai hnehloh tawng lovin an kal tawh a, November thlaa khelh tan tur World Cup ah pawh team game khel thiam Lionel Messi leh a ho te’n inrintawkna an neih zual phah sawt ngei ang.
1986 a World Cup chawitu hian 2022 ah pawh chawi theihna hun tha an nei ngei dawn e. Chutihrual chuan team tha tak tukdawl tur an nei tih erawh hriat a tul ang.
Tunah chuan World Cup-a Argentina Starting XI tha ber tur nia ngaih i han thlir ho teh ang:
GK – Emiliano Martinez (Aston Villa)
RB – Nahuel Molina (Atletico Madrid)
CB – Lisandro Martinez (Manchester United)
CB – Christian Romero (Tottenham Hotspur)
LB – Nicolas Tagliafico (Lyon)
DM – Guido Rodriguez (Real Betis)
CM – Rodrigo de Paul (Atletico Madrid)
CM – Giovani Lo Celso (Villareal)
RW – Lionel Messi (Paris Saint Germain)
CF – Lautaro Martinez (Inter Milan)
LW – Angel Di Maria (Juventus)
