2022 a football khelh chawlhsan player tha 5 te:

Professional footballer nun a thil harsa ber pakhat chu kum tam tak hnua football khelh chawlhsan hi ani awm e, rilru lam in la duh viau mahse taksa in a tlin tawh loh chuan mi tam takin inkhelh chawlsan zai an rel thin.

Tun kum 2022 a football khelh chawlhsan player tha 5 te chanchin tlem i lo en teh ang:

1.Mousa Demebele : Belgian midfielder kum 34 a upa Mousa Dembele hian chhungkua leh thian tha te nena hun tam zawk hman a duh avangin tun kum tir February khan inkhelh a chawlhsan thu a puang. 2005-2019 inkar khan club pali; Willem II, AZ Alkmaar, Fulham leh Tottenham Hotspur te tana khel in a hun tawp lam kum 3 erawh Guangzhou City tan a hlan. 2006-2018 inkar khan a ram Belgium tan match 82 ah a inlan bawk.

2.Laurent Koscielny : Kum 18 chhung meuh football a khelh hnuah Arsenal captain hlui hian tun kum March khan football khelh a chawlhsan thu a puang. A club hnuhnung ber chu Ligue 1 club Girondins de Bordeaux ani. Koscielny hian 2004 khan professional match debut neiin a club hmasa ber EA Guingamp tan kum 5 a inkhelh hnuin Lorient a zawm, Lorient a kum khat a cham leh hnuin Arsene Wenger enkawl Arsenal chu 2010 khan a zawm. French international hi Ligue 1 club Bordeaux a zawm hma in North London club ah kum 9 chhung hun a hmang a, 2014, 2015 leh 2017 te khan Arsenal chu FA cup a chawipui. A ram France tan pawh vawi 51 inlan in 2014 World Cup leh 2016 Euro ah te squad ah a tel.

3. Jermain Defoe : Tottenham leh England striker hlui kum 39 a upa Jermain Defoe hian tun kum March khan a boot a khai. Premier League striker ropui ber pakhat hian a hun tam zawk England ah hmang in club hrang hrang Portsmouth, Sunderland, Bournemouth, Westham United leh Tottenham Hotspur te tan a inkhel. MLS club Toronto FC leh Scootish club Rangers te pawh a zawm tawh bawk. Defoe hian Premier League match 496 a inlan atangin goal 163 a khung a, a ram England tan pawh game 57 inlan in goal 20 a khung bawk.

4. Aleksandar Kolarov : Serbian defender Kolarov hian kum 37 mi niin tun thla (June) khan inkhelh a chawlhsan thu a puang. Kolarov hian a inkhelh chhungin Europe club tha tak tak a zawm a chung te chu; Lazio, Manchester City, AS Roma leh Inter Milan te anni. Kolarov hian 2017 a City a chhuahsan hma in a team hlui tan hian Premier League title, FA Cup leh League cup te a chawi. Tin, Inter Milan tan Serie-A nomawi leh Coppa Italia te a chawi bawk. A ram Serbia tan pawh vawi 94 a inlan.

5. Carlos Tevez : Manchester khaw club hnih striker hlui hian tun thla (June) khan inkhelh a chawlhsan thu a puang a, inkhelh chawsawn thu a puan atanga kar hnih hnuah a ram club Rosario Central tan manager hna a thawk nghal. Argentine forward hlui hi Corinthians, Westham United, Manchester United, Manchester City, Juventus, Shanghai Shenhua leh Boca Juniors tan te a lo khel tawh. UEFA Champions League leh Copa Libertadores te chawiin a ram Argentina tan pawh 2004-2015 inkar khan game 76 inlanin goal 13 a khung. 2004 Oympic gold medal winner ani bawk.

Related Posts

error: Content is protected !!