Premier League club te chuan an squad thawmthat nan 2022-23 season transfer bazar chhung khan player thar lakluh nan pound billion chuang an thehchhuak a, a bikin Chelsea chuan sum an hmang tam fal nalh. Tin, club lian dang Manchester United leh Arsenal lam pawh in player thar lakluh nan sum tam an inseng bawk.
League danga player tha tha tak te’n Premier League an rawn pan a, an man a tam mai bakah an hlawh pawh a tlem lo. Borussia Dortmund atanga Manchester City pantu Erling Haaland chu 2022-23 Premier League signings a player hlawh tam ber a ni a, kum 22 a upa hian Etihad Stadium ah kartin £3,75,000 a hlawh a ni, a hnuaiah hian Sterling leh Casemiro te an awm ve bawk.
Tunah chuan Premier League 2022-23 signings hlawh tam zual top 10 i han thailang teh ang:
1. Erling Haaland – £51 million a Man City zawmtu Erling Haaland hi City player zinga hlawh tam ber dawt tu niin kartin £3,75,000 a hlawh mek a, a club thar tan goal 31 lai khung tawh in a tihtur a hai mawlh lo.
2. Raheem Sterling – £50 million a Man City atanga Chelsea zawmtu hi Premier League a player hlawh tam ber pawl niin English forward hian Stamford Bridge ah kartin £3,25,ooo a hlawh a ni. Sterling hian Chelsea ah beisei a pha lova, a club thar tan hian goal 6 chauh a la khung.
3. Casemiro – Kum 30 a upa lai ni tawh mahse Manchester United chuan an midfield buaina sukiang turin Real Madrid atangin £70 million laiin an leichhuak anih kha. Brazil international hian Red Devils tan a hna a tlin hle a, kartin £3,00,000 hlawh hi a phu hliah hliah.
4. Kalidou Koulibaly – Senegalese defender hian Chelsea ah kartin £2,95,000 a hlawh mek a, Premier League defender zingah ani aia hlawh tam awmchhhun chu Man Utd defender Raphael Varane chauh a ni. Hlawh tam viau mahse Koulibaly hian Chelsea ah beisei a pha lova, substitution bench a luahlum ta fo mai.
5. Gabriel Jesus – Pep Guardiola hnuaia hmun chang tam lo Gabriel Jesus hian £45 million in City atangin Arsenal a zawm a, Emirates Stadium ah kartin £2,65,000 a hlawh mek. A club thar tan season bul tan tha viau mahse hliam in a tlakbuak mek avangin tun thlengin a la inkhel thei lo.
Jesus hnuaiah hian Antony (£2,00,000 per week), Wesley Fofana (£2,00,00 per week), Manuel Akanji (£1,80,000 per week), Enzo Fernandez (£1,80,000 per week) leh Marc Cucurella (£1,75,000 per week) te an awm ve bawk.