Football hi khawvel infiamnaah chuan kan duh ber leh kan en tam ber a ni hial ang. Fan million chuang te chuan football en duh vangin kar tin stadium an luah lum deuh reng thin. Hetihlai hian billion chuangin inlam atang kan en ve bawk. Football hian sum a thawkchhuak nasa a, hei mai bakah sum an hmang chhuak hnem ve bawk.
Khawvel club lian leh hausa thenkhatte chuan an player hlawh pek nan sum an hmang chhuak nasa a. Tun tumah hian 2021-22 season a player te hlawh pe hnem football club 5 kan rawn tarlang ve dawn a ni.
5 Liverpool – £3,293,650 per week
Jurgen Klopp enkawl Liverpool hi tunlai Europe team a che tha ber pakhat anni. Reds hian match 10 an khel atang hnehna vawi 8 lai an chang a, season hlawhtling tak an hmang mek. Tun season ah hian Liverpool star thenkhatte an che tha hle a, an hlawh pawh a tam.
Virgil van Dijk hi Europe defender hlawh tam ber pakhat a ni a, tun season khelh mekah Liverpool player hlawh hnem ber a ni. Southampton player hlui Van dijk hian kar khatah £240,000 a hlawh. Premiere League goal khung hnem ber ni mek Mohamed Salah chu pahnihna niin kar khatah £225,000 a hlawh a, a chet that dan ngaihtuahin a hlawh tlem deuh.
Liverpool hlawh tam pathumna chu FC Barcelona leh Bayern Munich midfielder Thiago Alcantara niin kar khatah Pound 225000 a hlawh Mohamed Salah nen hian an hlawh zat a inang a ni.
Sadio Mane hian kar khatah pound 200,000 hlawhin Diogo Jota’an kar khatah pound 120,000 a hlawh ve bawk.
4 Chelsea – £3,419,370 per week
Roman Abramovich’an kum 2003 khan Chelsea a enkawl tan a, a enkawl hnuin Chelsea chu dinhmun sang takah a awm pui a ni. Sum lamah an buai lem lova Europe leh ram chhung inelna hrang hrangah pawh team tawhkhirh harsa ber pakhat anni.
Thomas Tuchel enkawlna hnuaiah Chelsea hian a vawihnihna atan UEFA Champions League nomawi an chawi a. Tun season khelh mekah pawh hian squad nei khawng ber a ni. Tun season khelhah pawh hian hlawhtlinna enge maw tak chang thei tura ngaih anni.
Chelsea player atanga hlawh hnem ber chu Romelu Lukaku niin, kar khatah pound 350,000 a hlawh. Chelsea hi a chet that pui zel thei ang em?
Chelsea midfielder N’Golo Kante hi Chelsea player hlawh hnem pahnihna a ni a, kar khatah pound 290,000 a hlawh.
Pathumnaah Timo Werner awmin, kar khatah pound 268,000 a hlawh a, tun season khelh mekah league match 9 a khelh tawh atang goal 1 chiah ala khung.
3 Manchester United – £4,132,000 per week
Premiere League club lian Manchester United hian 2012-13 season hnu lamah Premiere League nomawi an chawi leh tawh lova. Manager tamtakin chawi pui tum mahse, an la hlawhtlin pui thei lo. Tunah pawh hian nomawi chawi tumin an bei chho zel rih.
Player tha tak tak an la lut a, mahse, kum 5 liamta chhungin a sang berah pahnihna dinhmun an hauh hram.
Season tan tirh khan Manchester United chuan Cristiano Ronaldo chu la let lehin, an rinrawl ber pakhat a ni mek. Man Utd player hlawh hnem ber ni mekin kar khatah Pound 480,000 a hlawh hem mai.
Pahnihnaah goalkeeper David de Gea awmin, kar khatah pound 350,000 a hlawh, pathumna dinhmun hauhtu chu Paul Pogba niin kar khatah pound 290,000 a hlawh ve a ni.
2 Real Madrid – £4,662,500 per week
UEFA Champions League vawi 13 lai chawi tawhtu Real Madrid hi sum hman tam lamah an duailo hle. Player tha an la lut mai pawh ni lovin, an player te hlawh ringawtah pawh an inseng hnem hle.
2021-22 season khelh mekah hian Real Madrid star Gareth Bale chu Real Madrid player hlawh hnem ber a ni mek. Tunah hian kar khatah Pound 528,000 lai mai a hlawh a ni.
Chelsea supeperstar leh Real Madrid transfer history-a la chhe ber Eden Hazard hi pahnihna niin kar khatah pound 381000 a hlawh ve.
Summer transfer laia an lak luh David Alaba hian kar khatah pound 359,000 a hlawh a, pathumna dinhmun a hauh.
Toni Kroos, Luka Modric, leh Karim Benzema te hian kar khatah £307,000, £275,000, leh £275,000, theuh an hlawh.
1 PSG – £5,005,120 per week
Europe team lian ber pakhat anni a, Player hlawh pe chhuak hnem ber anni mek. PSG hian sum tamtak inseng ve thin mahse, Europe lamah hlawhtlinna an chang mang ngai lova, tun tumah hian chang thei tak ang maw.
2021 Summer transfer laia an lak luh Lionel Messi hian player hlawh tam ber record a break mek. Salary Sport in a tarlan dan chuan PSG hian Lionel Messi hi kar khatah £1 million lai a hlawhh niin an tarlang.
Kum 2017 khan Neymar chuan FC barcelona atang PSG a zawm a, PSG player hlawh hnem ber pahnihna a ni. Tunah hian kar khatah £602,000 a hlawh.
Pathumnaah Kylian Mbappe awmin kar khatah £413,000 a hlawh.
Source SK