Europe khawmualpuia football hmanga inelna ropui ber UEFA Euro 2020 chu a hun a thleng dawn hnai ta hle a. He inelna hi vawi 16 an neihna tur niin, nikum lama neih tura ruahman a nih laiin coronavirus darh nasat vanga kumina neih a ni ta a ni.
Euro 2020 ah hian team 24 te chu an inel dawn a, June 11 atanga July 11 thlengin match 51 an khel dawn a. Portugal chu title kawltu an ni mek a, an champion theihna tura France laka goal khungtu Eder chu kuminah a tel dawn lo a, heti chung hian Fernando Santos chuan player chhawr tur a la nei tha hle a ni.
Kumin inelnaah hian player tha tak tak an tel teuh dawn a, tlema kum la tam vak lo leh kum upa ve
tan tawh an tel nuk ang a, kum 30 chin chung lam zinga player tha leh langsar zual tur mi panga
han thlurbing ila.
5. Manuel Neuer, Germany
Kum 35 ni tawh mah se Manuel Neuer chuan khelmualah a la zahpuiawm lo hle a ni tih a la lantir thei hle a, tun hnai season hnih liam taah khan a la that zia chu a tilang chiang a. German goalkeeper hi tun dinhmunah khawvela goalkeeper ropui berte zingah a la tel reng a ni.
Manuel Neuer hian Bayern Munich chu trophy lak theih ang chu a lakpui vek tawh a, 2014 kumah khan Germany chu FIFA World Cup trophy pawh a lakpui bawk a. European Championship trophy hi a lak theih loh awm chhun a la ni a, kuminah hian Joachim Low kaihhruaina hnuaiah title hi lak ngei a tum dawn a. Group F ah France, Hungary leh Portugal te nen an awmho a, Neuer hian goalkeeper tha a nihna chu a lantir a pawimawh hle ang.
4. Luka Modric, Croatia
2018 FIFA World Cup ah khan Luka Modric hian Golden Ball a dawng a, Euro 2020 ah Croatia player zinga langsar ber a nih a rinawm a. Midfielder tha em em mai hian 2018 Ballon d’Or pawh a dawng tawh a, khawvela player ropui berte zingah a hming a lang zel tawh dawn a ni.
Croatia chu England, Czech Republic leh Scotland te nen Group D ah an awm a, group stage paltlang a knockout stage thlen theihna hun tha an nei dawn niin a ngaih theih a. Zlatko Dalic chuan European Championship title lak an tumna kawngah midfielder te a hmang tangkai hle tura ngaih a ni a, Modric bakah hian Ivan Rakitic, Mateo Kovacic leh Marcelo Brozovic te chu chhawr tur a nei hlawm a ni.
Kum 35 mi Modric hi a kum a tam ve tan tawh a, kumin bak hi Euro bikah phei chuan a inlan a rinawm tawh lo a, chuti chung chuan tun tournament-ah hian player langsar berte zinga mi a la nih ngei a rinawm.
3. Robert Lewandowski, Poland
Bayern Munich tan Robert Lewandowski hian goal a thun thei em em mai a, Poland tan pawh khatianga chet theih ngei kha a tum dawn a. Striker kum upa ve tan tawh hian Bundesliga season khat chhunga goal thun hnem ber record thar siamin, record hmasa siamtu Gerd Muller chu a khum tawh a. 2020-21 season-ah khan Lewandowski hian Bavarian club lian tan goal 41 zet a thun tling a ni.
Kum 32 mi Lewandowski hi Poland chhuanvawr ber tur a ni a, Arkadiusz Milik nen an inthlawp ngei tura ngaih a ni a. Poland chu Group E ah Slovakia, Spain leh Sweden te nen an awm a, knockout stage an thlen ngei dawn leh dawn loh sawi thiam a la harsa rih hle a. Chutiang ti thei tur chuan Robert Lewandowski chuan mawhphurhna pawimawh tak a chelh a tih theih.
2. Karim Benzema, France
France ram aiawha khel tura koh a nih leh avangin Karim Benzema chanchin hian Europe khawmualpui a fan kual nasa hle a, Les Bleus chu kumina champion thei tura rin kai ber pawl an nih phah a. Real Madrid striker hi khawvela striker hlauhawm berte zinga mi a ni chho mek a, an ram tan pawh tha taka a khelh theih ngei a rinawm.
Karim Benzema hian France chu trophy lian a la lakpui miah lo a, 2018 FIFA World Cup-ah khan champion mah se Didier Deschamps chuan a koh tel ve loh avangin medal a nei ve ta lo a. Euro 2020 a khel tura koh a nih ve leh takah chuan Kylian Mbappe leh Antoine Griezmann te nen tlar hma lamah theihtawp an chhuah dawn a ni.
Kum 33 mi Benzema hi a kum tam chho tan mahse khelmualah a la hlauhawm em em reng a, tun dinhmunah chuan attacker zinga tha ber pawl a la ni thei mek a ni.
1. Cristiano Ronaldo, Portugal
Portugal captain Cristiano Ronaldo chu kumin tournament-a che tha ber tura ngaih a ni a. Juventus star hi inkhelh la chawlhsan lo zingah chuan ram tana goal thun hnem ber a ni mek a, ram tana goal thun hnem lama record siamtu, Iranian star Ali Daei record, goal 109 chu goal 7 chauhin a la pel lo a, tun tournament-ah hian pelh theihna hun tha a nei ang.
Premier League season hmang tha tak Ruben Dias, Joao Cancelo, Bruno Fernandes leh Diogo Jota te bakah player tawn hriat nei tha tak tak an awm hlawm a, hei vang hian Portugal chu champion thei tura rin kai ber pawl an ni phak a, Cristiano Ronaldo hoin an title kawl lai humhim ngei an tum dawn a ni.
Source Sportskeeda