Tun hnaia beisei pha lo Phil Foden chuan FA Cup 5th round a Manchester City in 3-0 a Bristol City an hneh tumin goal hnih a khung a, Kevin De Bruyne chuan goal khat dang lo thawh ve in an team chu quarter final a luhpui.
Foden hian FA Cup inelna bik ah Cityzens tan match 18 a inlan atangin goal 10 leh assist vawi 5 a thawkchhuak tawh a, tun hnaia a game hnuhnung pahnih atangin goal 3 a khung tawh bawk. League game hnuhnung bera 4-1 a Bournemouth an hneh tumin English international hian goal khat a khung a ni.
Bournemouth laka a goal khung kha nikum November thla hnua a league goal hmasa ber a ni a, ke hliam avanga tun hnaia beisei pha lo Foden hi a rawn form chho leh tan tawh e.
”Ka ke lam a tha tawh hle a, tunah chuan 100% in ka fit tawh bakah nuam pawh ka ti hle. Chuvangin he team tana lo kir leh a ka theih ang anga tanpui hi ka duh a ni” tiin Bristol City laka goal hnih khungtu Foden chuan a hliam a dam fel tawh thu leh theitawp chhuah a team tanpui a duh thu a sawichhuak.
Kum 22 a upa chuan sawi chhunzawmin,” Ka career a ka hniam ber tum a ni hial maithei a, amaherawhchu tute pawh in hetiang hun chu an tawk thin a lawm. A pawimawh ber chu kan lo hmachhawn dan zawk hi a ni. Ka ke lam a nuam sam lo em em a, ka inkhelh tlem phah bawk. A tam thei ang bera inkhelh duh mi ka ni a, ka inkhelh tam loh chuan ka lunghnur mai thin” a ti.
Premier League champion City hian an game leh ah Newcastle United chu league ah an hmachhawn dawn a, team pahnihte hi tun Inrinni tlailam dar 6 ah Etihad Stadium ah an insu ang.
