Newcastle United in PSG star lak tumin an bei – Report

Newcastle United chuan neitu thar anneih hnuah transfer market lamah chet nat an tum nghal niin a lang, Paris Saint-Germain forward Mauro Icardi chu lak luh nghal an tum niin Calciomercato chuan a tarlang.

Kan hriat angin nimin lawkah Newcastle United chu Saudi-led consortium lamin an lei a. European football-a club hausa tia kan hriat thin Paris Saint-Germain leh Manchester United te huangah an awm der mai.

Hetia neitu thar an neih tak avang hian Newcastle United chu January transfer window lo awm turah hian an chet nat viau a rinawm hle. Neitu thar an neih atanga rei vak lovah player tha hrang hrang nena sawi zawm nghal anni a. Mauro Icardi mai bakah Nick Pope leh Anthony Martial te chu St. James’ Park lama insawn tur angin sawi a awm ve nghal.

Daily Mail in an tarlan dan chuan Newcastle United hian January transfer lo awm turah hian player lak luhna atan £200 million vel an insen a rin thu a tarlang a, hetiang zat hmang mahse, Financial Fair Play rules an bawhchhe thei dawn chuang lo a ni.

Paris Saint-Germain in Barcelona atang Lionel Messi an lak luh hnuah, Mauro Icardi hian PSG lamah hmun a chang thei vak tawh lova. Tunah chuan Leo Messi, Neymar, Mbappe leh Di Maria te hnungah awm tawhin Parisian club lian hi a chhuahsan thuai a rinawm.

Mauro Icardi hian PSG ah kum 2024 thleng contract a nei a. Newcastle United hian January transfer window-ah lak luh an tum tak tak a nih chuan PSG hian Icardi atangin sum tamtak an la lut thei dawn a ni. Kum 28 a upa Icardi hlutna hi €35 million niin Transfermarkt chuan an tarlang.

Report thenkhatin an tarlan dan chuan Newcastle United chauh hi Mauro Icardi la lut duh anni lova, European club lian thenkhat, Juventus leh Tottenham Hotpurs te pawh hi Icardi duh tu zingah an lang.

Source Sk

Related Posts

Leave a Reply

Your email address will not be published. Required fields are marked *

error: Content is protected !!