‘Man Utd in Harry Kane lak luh nan an player 4 hralh chhuak rawh se’

Manchester United legend Gary Neville chuan Manchester United in Tottenham Hotspur striker Harry Kane an lak luh theihna turin an player 4 te chu hralh chhuak turin a duh pui.

Manchester United hian tun summer transfer window-ah hian player lak luh nan sum tamtak an seng tawh a, Jadon Sancho leh Raphael Varane an lak luh mai bakah Tom Heaton pawh goalkeeper back up tur atan la lut bawk a ni.

A club hlui Man Utd in Harry Kane an la lut lo chu Neville chuan mak a ti hle a, Juan Mata, Jesse Lingard, Daniel James leh Anthony Martial te chu Harry Kane lak luhna sum tuak nan hralh chhuak turin a duh a ni.

“Engvangin nge Martial, James, Lingard te hi an chhuah loh ang, an hlawh a tam a, player dang lak luhna atan hralh chhuak mai se” tiin Neville chuan Monday Night Football show-ah Sky Sport a hrilh.

“Engvangin nge tunkar chhung hian Harry Kane hi an lak luh lovang, a chhan chu Harry Kane hi Manchester United-ah a lut a nih ngat chuan, points 90 atanga 95 vel an hmu thei ang. A tello chuan an hmu thei lovang.” tiin a sawi bawk.

“Tun atanga thla 12 na velah Manchester United hian Martial leh Cavani an chan thei dawn a, Mason Greenwood chauh hi centre forward an nei thei dawn, Marcus Rashford hi a tha hle a, vei lamah a awm ang.”

“Manchester United hian tun atanga thla 12 chhungin centre forward an mamawh ngei ka ring a, Pound maktaduai 150 i pe thei a nih chuan Kane hi in la thei dawn a ni.”

“Martial, James, Mata leh Lingard te tello hian club in thil tamtak a ti thei a, a mimal tak pawhin Kane hi United ah a lut a nih chuan thil a danglam ngei ang tih ka ring.”

Source SL

Related Posts

Leave a Reply

Your email address will not be published. Required fields are marked *

error: Content is protected !!