Luke Shaw’an assist vawi 2 a neih hnuah, Zidane nena khaikhin a ni, a nuih a ti za hle

England left back Luke Shaw chuan Ukraine an hmachhawn tumin assist vawi 2 a nei a, vawi khatna assist a neih hnu minutes 3 leh second 51 a liam awr tihah assist vawi 2 na a nei leh nghal.

He a assist neih hi French legend Zinedine Zidane’an France tan European Championship match 14 a khelha assist a neih ai a tam zawk a ni.

Harry Maguire’an goal 2 na a khung pawh kha Luke Shaw assist a ni a, hemi hnu rei vak lovah Harry Kane pet goal tur tha zet maiin a siam sak a ni. England lamin 4-0 in hnehna an chang.

Zidane’an Euro lama assist a neih ai tam a neih chungchangah Luke Shaw chuan ti hian a sawi, “Stats danglam tak a ni, thil duhawm tak pakhat a nih ka ring.” tiin a sawi.

“A nihna takah chuan Zidane hi midfielder tha ber pakhat a ni a, amah nena intehkhin chu a theih loh hrim hrim.”

“Mahse, ka tana thil pawimawh em em mai chu semi-final kan thleng hi a ni, Wembley lamah inkhelh theihna huntha kan hmu leh a, hetah hian hlimna kan thlen leh ngei ka beisei.” tiin a sawi bawk.

Euro 2020 ah hian England tan Luke Shaw hi a che tha hle a, England tan goal 4 lai maiah a inhnamhnawih tawh a ni.

Euro 2020 Qualifier match an khelh lai vel khan England squad-ah tel lo mahse, England coach Gareth Southgate’an tournament tak takah a tel tir ve avangin a lawm hle.

“Ka thil tum ber chuan theih ang tawka attacking leh defensively a team tanpui hi a ni.” tiin a sawi bawk.

“Mi tamtak chungah lawmthu ka sawi thei, mahse, Gareth Southgate’an min ring a, squad-ah min tel a, khel turin min thlang bawk, hei hi ka tan chuan a pawimawh hle.”

“Ka thawhrim phah a, manager tana ka mawhphurhna hi hlenchhuah theih ngei ka inbeisei.” tiin a sawi.

Source SK

Related Posts

Leave a Reply

Your email address will not be published. Required fields are marked *

error: Content is protected !!